Марказий банк Ўзбекистонда даромадлари турлича бўлган аҳоли учун ойлик ва йиллик инфляцияни маълум қилди.
Унга кўра, апрель ойидан бошлаб ички нархлар ўсишининг тезлашгани аҳолининг, айниқса, кам даромадли гуруҳларнинг сезилган инфляцияси юқори шаклланишига сабаб бўлди.
Бунда, июнь ойида даромадлари 2 млн сўмгача бўлган уй-хўжаликлари инфляциясининг умумий инфляциядан тафовути 2,4 фоиз бандгача ошган. Сентябрь ойи якунлари бўйича ушбу кўрсаткич 2 фоиз бандгача пасайди.
Ўтган ойда даромади 2 млн сўмгача бўлган аҳоли учун инфляция 14,2 фоизни ташкил қилган.
Бу кам даромадли уй хўжаликларининг истеъмол саватида озиқ-овқат маҳсулотларининг улуши юқорилиги шароитида апрель—сентябрь ойларида асосан озиқ-овқат маҳсулотлари нархларида юқори ўсувчи тенденциялар кузатилганлиги билан изоҳланади.
Сентябрда ойига 2 млн сўмдан 4 млн сўмгача даромад қиладиганларнинг инфляцияси 12,6 фоиз бўлган.
Бу кўрсаткич 4-5 млн сўм даромад қиладиганларда 12,4 фоиз бўлса, 5 млн сўмдан кўпроқ даромад қиладиганларда 11,8 фоизни ташкил қилган.
Бундан ташқари, ижтимоий товарлар нархлари ўсиши сентябрь ойида (йиллик ҳисобда) 16,9 фоизга тенг бўлиб, умумий инфляция билан фарқи 4,7 фоиз бандни ташкил этди.
Қайд этилишича, апрель ойидан бошлаб ички нархларнинг сезиларли даражада қимматлашиб боргани ижтимоий товарлар нархларининг ўсиш суратларида ҳам намоён бўлмоқда.
Бунга асосан, ўтган даврда ушбу гуруҳ товарлари таркибидаги ун маҳсулотлари (биринчи навли буғдой уни ва обинон), шакар, тухум, кунгабоқар ёғи ҳамда гуруч нархларининг кескин қимматлашиши оширувчи таъсир кўрсатди.
Изоҳ (0)