Ижтимоий тармоқларда Тошкент вилояти Қуйи Чирчиқ туманидаги 8-сонли мактабгача таълим ташкилоти тарбияланувчилари орасида ўткир диарея ҳолати қайд этилгани тўғрисида хабарлар тарқалди. Ҳолат юзасидан Санитария-эпидемиологик осойишталик ва жамоат саломатлиги хизмати маълумот берди.
Таъкидланишича, 28 сентябрь куни Қуйи Чирчиқ тумани тиббиёт бирлашмаси юқумли касалликлар бўлимига таълим ташкилотининг 23 нафар тарбияланувчиси кўнгил айниши, қайт қилиш, ич кетиши, тана ҳароратининг (37—39 даража) кўтарилиши ва томоғида оғриқ шикоятлари билан мурожаат қилган. Шифокорлар кўригидан сўнг улардан 15 нафарига ўткир респиратор инфекция, ЎРИ, функционал диарея бирламчи ташхиси қўйилиб, шифохонага ётқизилган. 8 нафарига эса кўрсатилган биринчи тиббий ёрдамдан кейин қониқарли аҳволда (ота-оналари шифохонага ётқизишдан бош тортган) уйларига рухсат берилган.
Юзага келган вазиятни жойига чиқиб ўрганиш ва беморларни даволаш ҳамда эпидемияга қарши тадбирларни ўтказишда маҳаллий мутахассисларга амалий ёрдам кўрсатиш учун Санитария-эпидемиологик осойишталик ва жамоат саломатлиги хизмати, Республика ихтисослаштирилган эпидемиология, микробиология, юқумли ва паразитар касалликлар илмий-амалий тиббиёт маркази мутахассислари Тошкент вилояти Қуйи Чирчиқ туманига юборилди.
Шифохонада бемор болаларга малакали тиббий хизмат кўрсатилган, тегишли лаборатория таҳлиллари учун намуналар олинган. Ўтказилган муолажалардан кейин аҳволи яхшиланган барча беморларга 2 октябрга қадар уйларига рухсат берилган. Беморлардан олинган намуналарнинг таҳлиллари натижаларига кўра, улардан 3 нафарида Shigella dysenteriae sonnei бактериялари аниқланди.
МТТ ичимлик ва оқова сув тизимлари, ошхона анжомлари, ҳаво сўрувчи вентиляция тизими, ҳожатхоналар санитария-гигиена талабларига тўлиқ амал қилинмаётгани аниқланди. Бундан ташқари, МТТда фаолият юритаётган ходимлардан 4 нафари тиббий кўрикдан ўтмаган.
МТТда таомлари (суткалик намуналар) ва озиқ-овқат маҳсулотлари, ошхона анжомлари ва юзаларидан олинган намуналарда ичак таёқчалари гуруҳига мансуб бактериялар (ИTБГ) аниқланди. Аниқланган камчиликларни бартараф қилиш ҳамда келгусида мактабгача таълим ташкилотлари тарбияланувчилари орасида овқатдан заҳарланиш ҳолатларига йўл қўймаслик юзасидан Мактабгача таълим вазирлигига хат киритилди.
30 сентябрдан 8-МТТнинг иш фаолияти йўл қўйилган камчиликлар бартараф этилгунга қадар вақтинча тўхтатилган ҳамда МТТ директорига нисбатан маъмурий баённома расмийлаштирилган.
Маълумот ўрнида, республикадаги барча таълим муассасалари ва мактабгача таълим ташкилотларидаги санитар-гигиеник ҳолатлар тизимли равишда Санепидхизмат мутахассислари томонидан ўрганиб борилмоқда.
Мавзуга доир:
Изоҳ (0)