Бой ва камбағал мамлакатлар ўртасидаги ҳаёт сифатидаги номутаносиблик COVID-19 пандемияси даврида ёмонлашди. Ғарбдан қарз олган ривожланаётган мамлакатлар энди соғлиқни сақлашга қараганда қарзни тўлаш учун тўрт баравар кўп маблағ сарфламоқда. Бу ҳақда The Guardian нашри хабар берди.
Нашр иқтибос келтирган Oxfam халқаро хайрия ва гуманитар ташкилот ҳисоботига кўра, кўплаб ривожланаётган мамлакатлар соғлиқни сақлаш соҳасидаги фавқулодда вазиятга қарамай, ижтимоий харажатларни қисқартирган.
Бунга улар Ғарб мамлакатлари кредиторлари олдидаги қарзларини тўлаш учун кўпроқ маблағ ажратишга мажбур бўлишгани сабаб бўлмоқда.
Кам даромадли мамлакатлар ўз бюджетларининг қарийб 27,5 фоизини қарзни тўлашга сарфлайди, бу улар таълимга сарфлаган маблағдан икки баравар ва соғлиқни сақлашга сарфлаган маблағдан тўрт баробар кўп, — дейилади ҳужжатда.
Бундан ташқари, Diamond Flower Inc (ДФИ) тадқиқот ташкилоти вакили Метю Мартиннинг сўзларига кўра, Соғлиқни сақлашга сарфланган ҳар бир доллар учун ривожланаётган мамлакатларда бой мамлакатлар кредиторлари олдидаги қарзни тўлашда тўрт доллар тўғри келади.
Коронавирус пандемияси оқибатларини бартараф этиш чораларини ишлаб чиқиш ўрнига, энг камбағал давлатлар давлат харажатларини кескин қисқартириш ва ижтимоий нафақаларни музлатиш орқали ўз қарзларини тўлашга мажбур бўлмоқда.
Ривожланаётган мамлакатларнинг тўртдан уч қисми келгуси беш йил ичида давлат харажатларини жами 7,8 триллион долларга қисқартиришни режалаштирмоқда, шу сабабли глобал тенгсизлик янада кучайишда давом этади.
Изоҳ (0)