Куз нафақат сап-сариқ барглари билан кўзни қамаштирувчи фасл, балки грипп даври ҳамдир. Октябр ойида эса анъанавий равишда унга қарши эмлаш мавсуми бошланади. Агар эмлаш керакми ёки йўқ деган танловга дуч келсангиз «Lisa.ru» нашри тақдим этган батафсил фактлар тўғри қарор қабул қилишга ёрдам беради.
Сўнгги бир неча йил ичида грипп вируси инсон хотирасидан коронавирус томонидан деярли чиқариб юборилди. Аммо умуман олганда, бу ҳали ҳам энг жиддий соғлиқни сақлаш муаммоларидан бири бўлиб қолмоқда. Касаллик мавсуми кузда бошланади ва майгача давом этиши мумкин.
Гриппга қарши эмлаш вирусга ва у келтириб чиқарадиган асоратларга қарши энг яхши ҳимоя ҳисобланади.
Йиллик гриппга қарши эмлаш қуйидагиларга ёрдам беради:
Инфекцияни олдини олиш. Эмлаш гриппга чалиниш хавфини 40-60 фоизга камайтириши мумкин.
Симптомларни камайтиради. Агар гриппга дучор бўлсангиз, эҳтимол эмланмагандек ёмон ёки узоқ вақт касал бўлмайсиз.
Асоратлардан ҳимоя қилади. Касалхонага ётиш ёки ҳатто ўлимга олиб келадиган грипп билан боғлиқ касалликларни ривожланиш хавфи камроқ бўлади.
Бошқаларнинг саломатлигини асраш мумкин. Гриппнинг юқумли экани маълум. Шунингдек, бу вақтда касаллик чақалоқ, қария, иммунитети заиф одамларга юқиши мумкин. Кимларгадир маълум ҳолатлар туфайли эмлаш мумкин эмас. Шундай вақтда эмланган инсонлар касаллик тарқатувчи манба ҳисобланмайди.
Вакцина ишлаб чиқиш
Ҳар йили гриппга қарши эмлаш вирусологларнинг келгуси мавсумда тарқалиши кутилаётган ўзига хос штаммларга қарши курашиш учун янгиланади.
Жаҳон соғлиқни сақлаш ташкилотининг Глобал жавоб бериш тизимининг бир қисми сифатида бутун дунё бўйлаб 144 миллий касалликларни назорат қилиш марказлари йил давомида грипп вируси назоратини олиб боради. Йилига икки марта ушбу марказларнинг етакчи олимларидан иборат қўмита маълумотларни таҳлил қилади ва ҳозир қайси штаммлар муҳим бўлишини аниқлайди. Уларнинг тавсиялари қуйидагиларга асосланади:
- Қандай грипп вируслари одамларда касалликни келтириб чиқаради?
- Ушбу вируслар қанчалик тез тарқалади?
- Уларга қарши олдинги мавсумдаги вакцина қанчалик самарали?
- Вакцина бошқа тегишли вирусларга қарши ўзаро ҳимояни таъминлай оладими?
Эмлаш касалликдан тўлиқ ҳимоя қилмайди, аммо жуда муҳим
Одамлар эмлашдан бош тортишининг биринчи ва энг кенг тарқалган сабаби бу вакцина ҳар доим ҳам иш бермаслигига ишонишдир. Умуман олганда, бу ҳақиқат. Ҳақиқатан ҳам ҳеч қандай вакцина ҳар қандай касаллик учун 100 фоиз самарали эмас.
Гриппга қарши эмлаш гриппга чалиниш хавфини 60 фоизгача камайтириши мумкин. Агар эмланмасангиз, гриппга чалиниш эҳтимоли анча юқори. Ушбу мавсумдаги вакциналарга штаммларни киритиш бўйича тавсиялар март ойида берилган ва грипп мавсуми ҳали тўлиқ авж олгани йўқ, шунинг учун уларнинг қанчалик самарали бўлиши номаълум. Аммо бу эмлашдан бош тортиш учун сабаб эмас.
Бундан ташқари, вакцина нафақат касалликдан, балки, энг муҳими, гриппнинг ўзидан анча хавфли бўлган асоратлардан ҳам ҳимоя қилади.
Изоҳ (0)