Эдинсон Кавани «Барселона»нинг 6:1 ҳисобидаги камбэкидан кейин психологга мурожаат қилгани ҳақида гапирди

«Валенсия» ҳужумчиси Эдинсон Кавани 2016/17 йилги мавсумда «ПСЖ»га қарши ўйинда «Барселона»нинг камбэкидан сўнг психологик ёрдам олгани ҳақида гапирди.

2016/17 йилги мавсум Чемпионлар Лигаси 1/8 финалининг биринчи ўйинида «ПСЖ» каталонияликлар устидан 4:0 ҳисобида ғалаба қозонган. Жавоб ўйинида эса «Барселона» камбэк қайд этиб, 6:1 ҳисобида ғалабани илиб кетди. «Кўк-анорранглилар» 88-дақиқадан сўнг 3 та гол уриб, кейинги босқичга йўл олган.

Қачон психологга мурожаат қилгани ҳақида

Биринчи марта «Барселона»нинг камбэкидан сўнг психолог қабулида бўлганман. Бу менга жуда қаттиқ таъсир қилганди. Сени ҳайратда қолдирадиган нарсалар доим бўлади. Беш дақиқа ичида биз қилган ҳамма нарса ўзгариб кетди.

Бу назорат қилиш имконсиз бўлган қаттиқ зарба эди. Футбол бўлса ҳам, шахсиятнинг бошқа қисмларига таъсир қилади. Хавотирга тушдим, совуқ тер босарди, ухлаганимда бошим айланиб кетарди. Ҳаттоки ухлашдан қўрқиб қолгандим.

«Бошимда муаммо бормикан?», — дея ўйлаб қолдим. «ПСЖ» шифокори ёнига бордим ва у менга: «Сен билан содир бўлаётган нарсалар турли соҳаларда кўп одамлар билан ҳам содир бўлади», — деди. Шунда мен суперқаҳрамон эмаслигимни тушуниб етдим.

Эдинсон Кавани, «Валенсия» ҳужумчиси