Bosh prokuratura huzuridagi departament Jizzax va Samarqandda pul mablag‘lari talon-toroj qilinishi bo‘yicha aniqlangan qonunbuzilish holatlari haqida ma’lumot berdi.
Xususan, departamentning Jizzax shahar bo‘limi tomonidan o‘tkazilgan tergovga qadar tekshiruvda, ATB “Qishloq qurilish bank”ning Jizzax mintaqaviy filiali sobiq boshqaruvchisi U.Yu., “Z.B.” MCHJga jiyani O.ni rahbar sifatida tayinlab, ushbu MCHJga yuk avtotransport vositalarini xarid qilish uchun 1,5 milliard so‘m kredit ajratilishiga erishib, keyinchalik 1,3 mlrd so‘mlik transport vositalarini boshqa shaxslarga sotib yuborib, kredit mablag‘larini o‘zlashtirish va rastrata qilish yo‘li bilan talon-toroj qilgani aniqlangan.
Departamentning Kattaqo‘rg‘on shahar bo‘limi tomonidan o‘tkazilgan tergovga qadar tekshiruvda, “N.M.” xususiy korxonasi rahbari N.M. va boshqalar hududiy tijorat banki filialidan eshik, deraza va mebel ishlab chiqarish uskunalarini sotib olish maqsadida 640 million so‘m kredit ajratilishiga erishib, ushbu mablag‘larni maqsadsiz ishlatib, talon-toroj qilgani aniqlangan.
Nurobod tuman bo‘limi tomonidan o‘tkazilgan tergovga qadar tekshiruvda, “T.Ch.” MCHJ rahbari I.Q. hududiy tijorat banki filialidan MCHJga hamda oila a’zolariga chorva mollarini sotib olish maqsadida ajratilgan 410 million so‘m kredit mablag‘ini maqsadsiz ishlatish orqali talon-toroj qilgani aniqlangan.
Shu kabi, departamentning Toyloq tuman bo‘limi tomonidan o‘tkazilgan tergovga qadar tekshiruvda, YATT Sh.D., “O-A.” fermer xo‘jaligi rahbari O.U. va boshqalar o‘zaro til biriktirib, shu tumanida yashovchi 10 nafar fuqaro nomiga kartoshka urug‘i olish uchun jami 237 million so‘m imtiyozli kredit rasmiylashtirishga erishib, ushbu kredit mablag‘larini o‘z ehtiyojiga ishlatib yuborilgani aniqlangan.
Mazkur holatlar yuzasidan jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)