Какаонинг инсон организмига қандай фойдали жиҳатлари мавжуд?

Какао флаванолларга, стрессни келтириб чиқарадиган юрак-қон томир касалликларининг олдини олишга ёрдам берадиган махсус молекулаларга бой. Шу жумладан какао инсульт, юрак хуружи ва тромбозга қарши ижобий таъсир кўрсатади.

Бирмингем университети олимлари тажриба ўтказган: бир гуруҳ соғлом эркакларга флаванолларга бой бир чашка какао, иккинчисига эса бу бирикмаларсиз ичимликни таклиф қилишган. Орадан 90 дақиқа ўтиб барча тадқиқот иштирокчиларидан руҳий стресс вазифасини бажариш сўралган.

Шундан сўнг тадқиқотчилар дам олиш ва стресс вақтида кўнгиллиларнинг билакдаги қон оқими ва юрак-қон томир фаолиятини ўлчаб, стрессли вазифани бажаргандан сўнг қон томирларининг 1,5 соат давомида қанчалик яхши ишлашини баҳолаган. Маълум бўлишича, стрессли вазиятлардан олдин какао ичган инсонларнинг қон-томирлари яхши ишлаган.

Руҳий стресс юрак тезлиги ва қон босимининг ошишига сабаб бўлади, шунингдек, юрак ва қон-томирларини қоплайдиган эндотелийга (ҳужайра мембранасига) салбий таъсир кўрсатиши исботланган. Бундан ташқари, бу ҳолат нохуш ҳодисадан кейин бир мунча вақт давом этади. Агар стрессли эпизодлар тез-тез рўй берса, бу қон-томирларининг ҳолатига таъсир қилади ва юрак-қон томир касалликларининг пайдо бўлишига олиб келади.

«Бизнинг натижаларимиз флаванолга бой какаони истеъмол қилиш эндотелиал дисфункцияни вақтинча камайтириши ва стресс пайтида қон фаолиятини яхшилаши мумкинлигини кўрсатди», — дейди лойиҳа муаллифлари.

Маълумот учун, флавоноллар яшил чой, олма, малина, гилос, қора узум, қизил узум, ясмиқ ва ловия таркибида ҳам мавжуд.

Мавзуга доир:

• Какао соғлиқ учун фойдалими?
• Лавлаги, какао, занжабил: Терининг узоқ вақт ёш сақланишига ҳисса қўшадиган 10 маҳсулот.