Kakao flavanollarga, stressni keltirib chiqaradigan yurak-qon tomir kasalliklarining oldini olishga yordam beradigan maxsus molekulalarga boy. Shu jumladan kakao insult, yurak xuruji va trombozga qarshi ijobiy ta’sir ko‘rsatadi.
Birmingem universiteti olimlari tajriba o‘tkazgan: bir guruh sog‘lom erkaklarga flavanollarga boy bir chashka kakao, ikkinchisiga esa bu birikmalarsiz ichimlikni taklif qilishgan. Oradan 90 daqiqa o‘tib barcha tadqiqot ishtirokchilaridan ruhiy stress vazifasini bajarish so‘ralgan.
Shundan so‘ng tadqiqotchilar dam olish va stress vaqtida ko‘ngillilarning bilakdagi qon oqimi va yurak-qon tomir faoliyatini o‘lchab, stressli vazifani bajargandan so‘ng qon tomirlarining 1,5 soat davomida qanchalik yaxshi ishlashini baholagan. Ma’lum bo‘lishicha, stressli vaziyatlardan oldin kakao ichgan insonlarning qon-tomirlari yaxshi ishlagan.
Ruhiy stress yurak tezligi va qon bosimining oshishiga sabab bo‘ladi, shuningdek, yurak va qon-tomirlarini qoplaydigan endoteliyga (hujayra membranasiga) salbiy ta’sir ko‘rsatishi isbotlangan. Bundan tashqari, bu holat noxush hodisadan keyin bir muncha vaqt davom etadi. Agar stressli epizodlar tez-tez ro‘y bersa, bu qon-tomirlarining holatiga ta’sir qiladi va yurak-qon tomir kasalliklarining paydo bo‘lishiga olib keladi.
“Bizning natijalarimiz flavanolga boy kakaoni iste’mol qilish endotelial disfunksiyani vaqtincha kamaytirishi va stress paytida qon faoliyatini yaxshilashi mumkinligini ko‘rsatdi”, — deydi loyiha mualliflari.
Ma’lumot uchun, flavonollar yashil choy, olma, malina, gilos, qora uzum, qizil uzum, yasmiq va loviya tarkibida ham mavjud.
Mavzuga doir:
Izoh (0)