Дунёда коронавирусни юқтириш ҳолатлари 6 фоиз, ўлим кўрсаткичи эса 12 фоизга камайди

Ўтган ҳафтада дунё бўйича 2,9 миллиондан ортиқ кишида коронавирус аниқланди, кўрсаткичлар 19—25 сентябрь саналарига қиёслаганда 6 фоизга камайган.

Қайд этилишича, COVID-19 сабаб ҳафта давомида 8,3 минг нафардан зиёд бемор вафот этган. Жаҳон соғлиқни сақлаш ташкилоти бу рақамларни таҳлил қилиб, ўлим ҳолатлари сони 12 фоизга пасайганини маълум қилди. Сезиларли камайиш динамикаси Африка (-32 фоиз) ва Ғарбий Тинч океани минтақаси (-22 фоиз) мамлакатларида кузатилди. Европада эса аксинча 8 фоизлик ўсиш қайд этилди. Ўлим ҳолатларининг пасайиши эса барча минтақаларда рўйхатга олинди.

Ўтган ҳафта ичида энг кўп бемор Германияда аниқланди — 400 мингдан зиёд киши. АҚШда хасталикка чалинганлар сони 312 минг, Японияда 306 минг нафардан ошди. Хитой (303 минг) ва Франция (қарийб 265 минг) эса навбатдаги ўринларни банд этди.

Юқори ўлим кўрсаткичлари бўйича АҚШ яна олдинда. Бу ерда хасталик туфайли 2728 киши ҳаётдан кўз юмди. Шунингдек, Россияда 711, Японияда 563, Хитойда 368 ва Бразилияда 286 нафар бемор коронавирус қурбонига айланди.

ЖССТ эксперти Мария ван Керховенинг таъкидлашича, ҳозир дунёда омикрон штаммининг БА.5 субварианти доминант. Хасталикдан асосан эмланмаган аҳоли қатлами азият чекмоқда.