«Дарё» кундалигида содир бўлган энг муҳим воқеалар
«Дарё» нашри 5 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Президент Шавкат Мирзиёев куз-қиш мавсумидаги вилоят сафарларини бошлади
Шавкат Мирзиёев қишлоқ хўжалигидаги ишлар ҳолати, аҳоли ҳаёти билан танишиш мақсадида 6 октябрь куни Сирдарё вилоятига келди, деб хабар бермоқда президент матбуот хизмати.Маълум қилинишича, давлат раҳбари Сирдарё туманидаги бир нечта фермер хўжаликлари даласини кўздан кечириб, шу ерда сирдарёлик фермерлар, нуронийлар билан суҳбатлашган.Президент Сирдарё вилоятига ташриф чоғида Сайхунобод туманидаги кластерни бориб кўрди.
Давлат раҳбари бу ерда журналистлар билан ҳам мулоқот қилиб: «Сирдарёда 2023 йили ишсизликни тугатишга бор кучимиз билан ҳаракат қиламиз. Кластерларда, фермер хўжаликларда, шунингдек, вилоятнинг турли ҳудудларида янги иш ўринлари яратамиз, — дея таъкидлаган.
Запорожье шаҳридаги турар жойларга ракета зарбалари берилди.
6 октябрь куни эрта тонгда Россия қўшинлари Украина ҳукумати назорати остидаги Запорожье шаҳрига еттита ракета ҳужуми уюштирди. Бу ҳақда Запорожье вилояти ҳарбий бошқармаси бошлиғи Александр Старух маълум қилди.
Старухнинг сўзларига кўра, зарбалар нишони инфратузилма объектлари бўлган, аммо ракеталар кўп қаватли турар жой биноларига тушган. Уйлар жиддий шикастланган, шаҳарда ёнғинлар бошланган.
«Запорожье шаҳрига ракета ҳужумлари оқибатида икки аёл ҳалок бўлди, яна беш киши вайроналар остида қолмоқда», — деди Старух.
Бундан аввалроқ Россия президенти Владимир Путин ҳукуматга Россия таркибига киритилган Запорожье вилояти ҳудудида жойлашган Запорожье атом электр станцияси объектларини РФ федерал мулкига ўтказишни топширди. Тегишли фармон ҳуқуқий ахборот расмий интернет-порталига жойланган.
Польша АҚШдан унга ядро қуролидан фойдаланиш имкониятини беришни сўради
Польша Россия томонидан ўсиб бораётган хавфларга қарши туриш учун ядро қуролидан биргаликда фойдаланиш дастурида иштирок этиш бўйича АҚШ билан музокаралар олиб бормоқда. Бу ҳақда Польша президенти Анжей Дуданинг Газета Полска нашрига берган интервьюсига таяниб, «Украинская Правда» хабар берди.
Ядро қуролидан биргаликда фойдаланиш дастурида иштирок этиш бўйича потенциал имконият доим мавжуд. Биз америкалик етакчилар билан АҚШ шундай имкониятни кўзда тутяптими-йўқми — шу ҳақда гаплашдик. Мавзу очилди», — деди Анжей Дуда.
Ядро қуролидан биргаликда фойдаланиш дастури НАТОнинг ядровий тийиб туриш сиёсатининг бир қисми бўлиб, у бундай қуроли бўлмаган аъзо мамлакатларга уни қўллашни режалаштиришда қатнашиш имконини беради
Шимолий Корея ўзининг ракета синовларини АҚШ ва Жанубий Корея машғулотларига «адолатли жавоб» деб атади
Шимолий Корея сўнгги кунларда амалга оширган ракета синовларини АҚШ ва Жанубий Кореянинг қўшма машғулотларига адолатли жавоб деб атади. Бу ҳақда Корея марказий телеграф агентлигига таяниб, «Коммерсантъ» хабар бермоқда.
Шимолий Корея ўтган ҳафта Япон денгизига тўртта баллистик ракета учирган эди. 4 октябрь куни эса мамлакат Япония томонга ракета учирди. 6 октябрь куни Шимолий Корея Япон денгизи томон яна иккита ракета учирди. Бу АҚШ ва Жанубий Корея йирик ҳарбий машғулотлар олиб бораётган пайтда юз берди. Вашингтон КХДРнинг ракета учиришлари сабаб БМТ Хавфсизлик кенгаши йиғилишини ўтказишни сўраган.
