Ўзбекистонда чет эл валютасидаги кредитлар фоизи рекорд даражада ошди

Марказий банк Ўзбекистонда август ойи учун кредит бўйича ўртача фоиз ставкаларини эълон қилди.

Унга кўра, августда аҳолига ажратилган кредитларнинг ўртача фоиз ставкаси аввалги ойга нисбатан 0,7 фоизга пасайган ва 22,7 фоизни ташкил қилган. 

Тадбиркорларга ажратилган кредитлар фоизи эса июлга нисбатан 0,4 фоизга ўсиб, ўртача 21,9 фоизга етган.  

Август ойида аҳолига ажратилган кредитларнинг ўртача фоизи апрелдан бери энг паст даражани қайд этган. 

Шунингдек, чет эл валютасидаги қисқа муддатли кредитларнинг ўртача фоиз ставкаси 7,5 фоизга етган. Бу 2021 йилнинг январидан бери энг юқори кўрсаткичдир. Икки ой ичида бу турдаги кредитлар ўртача 1,5 фоизга ошган. 

Чет эл валютасидаги узоқ муддатли кредитларнинг ўртача фоиз ставкаси эса 2020 йилнинг май ойидан бери энг юқори даражага етган — 7,3 фоиз.