Европа тикланиш ва тараққиёт банки (EТТБ) Ўзбекистоннинг пўлат ишлаб чиқариш соҳасидаги хусусий ишлаб чиқарувчи «Тошкент қувур заводи»га 15 миллион доллар миқдорида кредит ажратди. Бу ҳақда банк матбуот хизмати хабар бермоқда.
Маблағлар завод фаолиятини қўллаб-қувватлаш орқали Ўзбекистоннинг пўлат ишлаб чиқариш секторида энергия самарадорлигини оширишга кўмаклашиши кутилмоқда.
Кредит «Тошкент қувур заводи»га бўйлама сув остида пайвандланган қувурларни (LSAW) ишлаб чиқаришни йўлга қўйиш ва спирал сув остида пайвандланган қувурлар (SSAW) ишлаб чиқаришни босқичма-босқич камайтириш имконини беради.
Юқори эгилувчанлиги, пайванд чокининг мустаҳкамлиги ва муҳрланиши билан LSAW қувурлари қурилиш, марказий иситиш, сув таъминоти, канализация тозалаш каби соҳаларда кенг қўлланилади.
Бу, айниқса, яқин йилларда иқтисодиёти қарийб 6 фоизга ўсиши кутилаётган Марказий Осиёнинг аҳолиси энг кўп давлати учун муҳим.
Ўсиш, бошқа омиллар қатори, Ўзбекистон аҳолисининг кўпайиши учун зарур бўлган янги уй-жойларга талабнинг ортиши билан боғлиқ.
EТТБ 2025 йилга келиб йиллик инвестицияларининг 50 фоиздан ортиғини яшил қилиш учун иқлим ва атроф-муҳитни молиялаштиришни кенгайтиришни режалаштирмоқда.
Бугунги кунга қадар EТТБ Ўзбекистонда 113 та лойиҳага қарийб 3,6 миллиард евро сармоя киритди.
Аввалроқ Ангрен труба заводини хусусийлаштириш жараёни давом этаётгани ҳақида хабар берилганди.
Изоҳ (0)