Чеченистон Украинага «ўқитиб тайёрланган жангчилар» бўлинмасини жўнатди, яна бир жанговар гуруҳни яқин орада юборишга тайёргарлик кўрилмоқда. Бу ҳақда республика раҳбари Рамзан Қодиров ўз Telegram-каналида маълум қилди.
«Бу шунинг учун қилиняптики, бизнинг ҳужум чизиғимиз максимал даражада зич бўлсин, жангчилар шиддатли ҳужумларда навбат алмашиб, бир-бирининг ўрнини боссин», — дея аниқлик киритди у.
Украинада Россия махсус операцияси бошланганидан кейин, март ўрталарида Чеченистондан мингдан ортиқ кўнгиллилар жанговар ҳаракатларда қатнашиш учун жўнаб кетганди. Шундан кейин Қодиров янги гуруҳлар юборилгани ҳақида кўп бора хабар қилган. 15 сентябрда эса у Россия ҳудудлари раҳбарларига мурожаат қилиб, «ўз-ўзини сафарбар қилиш»ни таклиф этганди. Орадан олти кун ўтиб, Путин қисман сафарбарлик эълон қилди.
Қодиров Чеченистонда сафарбарлик бўйича режа «254 фоизга ошириб бажарилгани»ни маълум қилди ҳамда республикада минг нафар кўнгиллидан иборат захира борлигини, улар «зарур бўлган ҳолда Ватан ҳимоячилари сафларини тўлдира олиши»ни айтди.
Изоҳ (0)