Бразилияликлар биринчи босқичда президентни сайлай олмади, деб ёзади «РБК» мамлакат Олий сайлов судига таяниб.
Иккинчи босқичга амалдаги давлат раҳбари, Либерал партия етакчиси Жаир Болсонару ва «Бразилия умид федерацияси» социалистик коалиция томонидан илгари сурилган собиқ президент Луис Инасиу Лула да Силва (2003—2010 йиллар) ўтди.
Сайлов бюллетенларининг 97,77 фоизи ҳисоблаб чиқилганидан кейин маълум бўлишича, Болсонару овозларнинг 43,59 фоизини, унинг рақиби эса 47,98 фоизини тўплаган.
Номзодлардан ҳеч бири овозларнинг ярмидан кўпини йиғишга муваффақ бўлмагани учун, 30 октябрь куни сайловларнинг иккинчи босқичи ўтказилади.
Сайловда жами тўққиз номзод қатнашмоқда, бошқалар катта фарқ билан орқада қолмоқда. Етти киши 1 фоиз ҳам овоз тўплай олмади.
2018 йил 28 октябрда бўлиб ўтган аввалги сайловларда Болсонару 55,54 фоиз овоз йиғиб ғолиб бўлганди. У 2019 йил январидан буён мамлакатга раҳбарлик қилиб келади. Болсонару консерватив Социал-либерал партия вакили бўлиб, ўзининг ўта ўнг ва популистик қарашлари билан танилган.
Лула да Силва 2016 йилда Петробас иши бўйича судланиб, 12 йилга қамалганди. Аммо апелляция ҳуқуқидан фойдаланиб, 2018 йил апрелигача озодликда қолди, шундан кейин суд ҳукмни бекор қилишдан бош тортиб, собиқ президентни ҳибсга жўнатди. 2018 йил августида меҳнаткашлар партияси уни президентликка номзод сифатида илгари сурди, бироқ Олий сайлов суди уни рўйхатга олишни рад этди.
Изоҳ (0)