Марк Цукерберг қандай қилиб энг бой америкаликлар ўнлигини тарк этди?
Марк Цукербергнинг шахсий бойлиги бир йил ичида икки баробардан кўпроққа қисқарди, бу эса унга энг бадавлат америкаликлар 10 талигига киришига тўсқинлик қилди. Цукерберг бу йил 11-ўринни эгаллади. Бу ҳақда Forbes хабар бермоқда.
2015 йилдан бери биринчи марта Meta (Facebook) асосчиси Марк Цукерберг энг бой 10 америкалик қаторига кирмади.
2021 йил сентябр ойидан бери Цукерберг бойлигининг ярмидан кўпини йўқотди — 76,8 миллион доллар — ва Forbes’нинг 400 та америкалик энг бой одамлар рўйхатида учинчидан 11-ўринга тушди.
2-сентябрдаги котировкаларга кўра, Цукербергнинг бойлиги 57,7 миллиард долларга баҳоланмоқда. Ўтган бир йил давомида Америкадаги энг бадавлат кишилар рўйхатида ҳеч ким Цукерберг каби зарар кўрмаган.
Унинг кучли ўнталикдан кетишига Меtа (Facebook) акцияларининг тушиб кетгани сабаб бўлди. Ўтган йилги Forbes 400 рейтинги эълон қилинганидан бери компания акциялари 57 фоизга тушиб кетди.
Шу билан бирга, Microsoft 14 фоизга, Alphabet 25 фоизга, Amazon’нинг акциялари эса 27 фоизга пасайган.
Июль ойида Меtа компания тарихида биринчи марта чораклик даромаднинг камайиши ҳақида хабар берди: 1 фоизга — 28,8 миллиард долларгача.
Ўтган йили Apple’нинг махфийлик сиёсати янгиланиши инвесторларни тўхтатиб қўйди, бу технология компанияларига бошқа иловалардаги фойдаланувчи фаоллигини кузатишга тўсқинлик қилади ва бу Меtа’нинг реклама даромадига таъсир қилади.
Facebook рекламадан катта пул топади, ҳозир эса унда бундай маълумотлар йўқ, — дейди Бенчмарк тадқиқот ва инвестиция фирмаси таҳлилчиси Марк Згутович.
Февраль ойида Меtа биринчи марта кундалик фаол фойдаланувчиларнинг камайгани ҳақида хабар берди.
Оддий шароитларда, даромаднинг озгина пасайишини тузатиш мумкин эди, аммо Меtа виртуал ҳақиқат ва метаверсега катта сармоя киритмоқда ва бу операцион фойдани камайтиради.
2021 йилда компаниянинг метаверсе бўлими Меtа Reality Labs 10 миллиард доллар зарар кўрди.
Меtaverse узоқ муддатли инвестиция. Ҳозирча бу кўпроқ зарар кўрувчи корхона, — дейди Згутович.
Цукерберг илк бор 2008 йилда, Facebook ижтимоий тармоғига асос солганидан атиги тўрт йил ўтиб миллиардерга айланди. 23 ёшида у ўша пайтдаги энг ёш миллиардер эди ва 1,5 миллиард доллар бойлиги билан Forbes 400 да 321-ўринни эгаллаган. 2011 йилга келиб эса Цукербергнинг бойлиги қарийб 12 баробар ўсди ва 17,5 миллиард долларга етди.
Цукерберг бойлигининг биринчи марта бундай тушиб кетаётгани йўқ. Facebook’нинг 2012 йилдаги машҳур IPO’сидан сўнг Цукерберг The Forbes 400 рейтингида 14-ўриндан 36-ўринга тушиб кетган. Аммо бу узоққа чўзилмаган.
Кейинги йили Цукерберг ўз позициясига қайтди ва ҳозиргача унинг бойлиги фақат ўсиб борди. Компания бир қатор муаммоларга дуч келганига қарамай, Facebook доимий равишда инвесторларни ҳайратда қолдириш учун етарли маблағ ишлаб чиқарди.
Цукербергнинг бойлиги эса ўтган йили 134,5 миллиард долларга кўтарилди, бу унинг ҳозиргача бўлган рекорди.
Келгуси йил нима бўлади?
Forbes ҳисоб-китобларига кўра, Цукербергнинг деярли барча бойлиги Меtа акцияларида яъни у Меtaverse учун компаниянинг узоқ муддатли истиқболларини (ва ўзининг улкан бойлигини) хавф остига қўйишга тайёр.
У дастлабки қийинчиликларни енгиб ўтадими ёки йўқми ҳали аниқ эмас. Ўтган ой Меtа’нинг янги виртуал реаллик ижтимоий тармоғи Horizon Worlds’да Цукерберг селфи жойлаштирганида уни масхара қилишган.
Кейинроқ у сурат «анчалик ибтидоий» эканлигини тан олиб, яқин келажакда графикани яхшилашга ваъда берган. Ўшандан бери Меtа акциялари 8 фоизга тушиб кетди.
