Uzbekistan Airways фойдаланилмаган авиачипта учун пулларни қайтариш жараёнини соддалаштиради

Uzbekistan Airways ижтимоий тармоқларда чоп этилган авиачипта пулини қайтариш тўғрисидаги хабарлар бўйича баёнот берди.

Компаниянинг маълум қилишича, бугунги кунда авиакомпания йўловчилари фойдаланилмаган авиачипта учун пул маблағини қайтаришни чипта сотиб олинган жойда — авиакомпаниянинг расмий сайтида, Uzbekistan Airways Sales филиалида ва авиакомпаниянинг чет элдаги ваколатхоналарида расмийлаштиришлари мумкин.

Авиакомпаниянинг расмий сайтида чипта пулини қайтариб беришни расмийлаштиришда йўловчининг шахсий маълумотлари, хизмат кўрсатувчи банк тўғрисидаги маълумотлар ва авиачипта маълумотларини киритиш талаб этилади. 

Фойдаланилмаган авиачипта учун пулни қайтариб бериш шакли Ўзбекистон ҳудудида фаолият олиб бораётган банкларининг талабларига мувофиқ ишлаб чиқилган ва ушбу маълумотларни киритмасдан, пулни қайтариш бўйича авиакомпаниянинг молиявий кўрсатмаси кўриб чиқилмайди, — дейилади компания хабарида. 

Таъкидланишича, айни пайтда авиакомпанияда бу борадаги барча жараёнларни соддалаштириш бўйича тизимли ишлар олиб борилмоқда. 

Тез орада авиакомпания сайтида фойдаланилмаган ёки қисман фойдаланилган авиачипталар учун пул маблағини қайтаришнинг соддалаштирилган функциясидан фойдаланиш йўлга қўйилади, — дейди Uzbekistan Airways.

Қайд этилишича, авиакомпания расмий сайтида авиачиптани қайтариш шаклини сезиларли даражада соддалаштиради. 

Бундан ташқари барча ахборот хавфсизлиги талабларига риоя қилган ҳолда, тўлов тизимларининг халқаро стандартларга мувофиқ узлуксиз ишлашини таъминлаш ҳам маълум қилинган.

Аввалроқ ижтимоий тармоқларда компаниянинг фойдаланилмаган авиачипталар учун пулларни қайтариш жараёни мураккаблиги ҳақида хабарлар тарқалган эди.