Якунланаётган ҳафта ўзбекистонлик амалдорлар учун оғир келди. Президент администрацияси раҳбари Сардор Умрзоқов бошчилигидаги йиғилишда беш нафар ҳокимнинг айби бирма-бир саналди ва лавозимидан олинди. Сўконғичлиги билан жамоатчилик эътиборини тортган Сурхондарё вилояти ҳокими Тўра Боболов эса ойлик маошининг 40 фоизи миқдоридаги жарима билан сийланди. «Дарё» ўзбек амалдорлари учун оғир келган ҳафтанинг энг шов-шувли воқеаларини ёдга солишда давом этади.
Президент администрацияси раҳбари Сардор Умрзоқов раислигидаги йиғилишда давлат раҳбари Шавкат Мирзиёев қарори билан Асака, Фарғона, Пахтаобод, Нуробод ва Андижон туманлари ҳокимлари ишдан олингани маълум қилинди.
Йиғилишда Сардор Умурзоқов Андижон тумани ҳокимига «Эгамбердиев, жаноби олийлари, селектор йиғилишида айвонда ўтирмаяптиларми?», дея кесатиқ билан мурожаат қилган.
Ҳамма кўрди. Бутун дунёга шарманда бўлдик. Айвонда ўтириб олиб, масофани сақлашни баҳона қилдингиз, ундай бўлса, нега сектор раҳбарларини ёнингизга ўтқазиб қўйдингиз? Фуқароларга нисбатан ҳурматсизлик, димоғдорлик, кибр-ҳаво. Бу нима деган гап? Бутун жамиятимиз, ижтимоий тармоқда қизғин муҳокама ва эътирозларга сабаб бўлди. Жамоатчилик олдида сиз ўзингизни эмас, Андижон тумани ҳокимлигини эмас, бутун давлат тизимини, бутун президент жамоасини обрўсизлантиришга олиб келдингиз. Шунинг учун ҳурматли президентимиз қарор қабул қилдилар: биринчидан, сиз эгаллаб турган лавозимингиздан бугун озод қилинасиз, иккинчидан, сизнинг бу хатти-ҳаракатингизга ҳуқуқий баҳо берилади», — деди Сардор Умурзоқов.Умрзоқов шунингдек, Фарғона тумани ҳокимига мурожаат қилиб «Мўминов, сиз жуда яхши биласиз, алоҳида жиноят иши қўзғатилган. Сизнинг туманингизда тендерсиз ер майдонларини ажратиш бўйича қарорлар чиқарилган. Унумдор бўлган 25 гектардан кўп ер майдонини бириктириш эвазига нималар бўлганини ҳам жуда яхши биласиз», — деган.
Сардор Умурзоқов ушбу йиғилишда Асака тумани ҳокимини ҳам ишдан олиш, залдан чиқариб юбориш кераклигини таъкидлаб «...жаноб Алихонов. Ер ажратиш масаласида 56 та қарор билан 2 минг 390 гектар ер ноқонуний ажратилган. 2021—2022 йилларда, бир ярим йилнинг ичида ер билан боғлиқ ноқонуний ҳолатлар бўйича 15 та жиноий иш қўзғатилган. Шунинг учун бугун президентимизнинг қарорлари билан сиз ҳам лавозимингиздан озод этиласиз», — деган бўлса, Пахтаобод ҳокими Усмоновга «Сизнинг топшириғингиз билан ‘Ҳар бир оила — тадбиркор‘ дастури доирасида ‘Барлос асали’ фермер хўжалигига чорва ҳайвонлари учун 4 миллиард 800 миллион сўмлик 291 та имтиёзли кредит берилган. Ҳозир қўйлар фуқароларга ҳақиқатан етказиб берилгани ва бошқа ҳолатлар ўрганилмоқда. Алоҳида текшириш бўляпти. Бу ўз йўлига. Бошқа ҳолатлар ҳам бор. Улар далил-исботи билан, расми, аудиоси билан менинг столимда турибди ҳозир. Бугун ҳурматли президентимиз топшириғи билан сиз лавозимингиздан озод этиласиз. Залдан чиқиб кетинг», — деган.
Мазкур воқеалар фонида Қорқалпоғистон Жўқорғи Кенгеси раиси Аманбай Ўринбаев қорақалпоғистонликлар мурожаатини Telegram бот орқали қабул қилишини маълум қилди.
Мазкур ҳафтада, шунингдек, Қашқадарё вилояти ва Бухорода аёлларнинг ўзини поезд тагига ташлаб, жонига қасд қилиш ҳолати содир бўлди. Қашқадарё вилоятининг Косон туманида 38 ёшли аёл ва 19 ёшли қиз ўзини поезд тагига ташлаб, ўз жонига қасд қилган бўлса, бухоролик аёл юк поезди тагида қолгани ва вафот этгани маълум қилинди.
Шунингдек, Фарғона вилоятида ИИБ ходимлари фуқарони дастлаб бўғгани, сўнгра уни тепкилагани кўринган видео тарқалди. Мазкур воқеага муносабат билдирган Ички ишлар ахборот хизмати раҳбари Шоҳрух Ғиёсов ИИБ ходимларининг мазкур ҳаракати суд томонидан оқланганини билдирди. Жамоатчилик муҳокамасига сабаб бўлган воқеага қўшимча ахборот берган Фарғона вилояти суди ИИБ ходимлари дастлабки инстанцияда ойлик маошининг 30 фоизи миқдорида жаримага тортилгани, шунингдек, 2 йил муддатга ахлоқ тузатиш жазосини олганини очиқлади.
Ўтаётган ҳафтада Қашқадарё вилоятининг Чироқчи туманида туғилган чақалоқ Самарқанддаги вилоят болалар кўп тармоқли тиббиёт марказига даволанишга юборилгани ва мазкур шифохонда дом-дараксиз йўқолгани хабар қилинди.
Маълум бўлишича, ота-онаси томонидан яхши ниятларда Асилбек Оллаберганов дея исм берилган чақалоқ 2022 йилнинг 10 май куни Чироқчи туман тиббиёт бирлашмасининг туғруқ бўлимида дунёга келган.«Болам кесарча кесиш йўли билан туғилди. Аҳволи ва соғлиғи яхши эди. Шунга қарамасдан 12 май куни «вакум»да даволаш учун Самарқандга юборилди. Менинг соғлиғим яхши бўлмаганлиги сабаб туғруқхонада қолдим. Болам эса дадаси ва менинг онам ҳамроҳлигида Эъзоза Умарова исмли аёлнинг эгизак фарзандлари билан бирга Самарқанд шаҳрига олиб кетилди. Мен эса Самарқандга 19 май куни етиб бордим. Борсам, қўлимга нотаниш болани тутқазишди. Шунда бу менинг болам эмас, алмашиб қолган, дедим», — деганди мурожаатчи Зиёда Жовлиева.
Наманган вилоятида 2006 йилда туғилган бола эса ижтимоий тармоқларда машҳурликка эришиш учун поезд йўлидаги электр симёғочга чиқиб суратга тушишга уринганда уни ток урган.
«Дарё» ўқувчиларига энг шов-шувли воқеаларни улашишда давом этади.
Изоҳ (0)