«Дарё» кундалигида 30 сентябрда содир бўлган энг муҳим воқеалар
«Дарё» нашри 30 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия самолёти Польша чегарасига яқинлашгани туфайли Италия қирувчиси ҳавога кўтарилди
Польша ҳаво ҳудудини тартибга солиш бўйича НАТО миссиясида қатнашаётган Италия Ҳарбий-ҳаво кучлари Польша чегарасига яқинлашган Россия самолёти туфайли ҳавога кўтарилди, деб хабар бермоқда «РБК».
Россия ҳаво кемасига Eurofighter қирувчи самолёти «пешвоз чиқди».
Бу Польшада Италия авиацияси зудлик билан ҳавога кўтарилиши билан боғлиқ биринчи ҳолат эмас — 27 сентябрь куни Италия Ҳарбий-ҳаво кучлари НАТОнинг шимоли-шарқий чегарасида Россиянинг учта самолёти тўхтатиб қолинганини маълум қилганди. Айни вазиятда Италия Россияда қолишга зарурати бўлмаган фуқароларига зудлик билан у ерни тарк этишни тавсия қилди
Запорожьеда гуманитар карвон ўққа тутилди. 20 нафардан ортиқ одам ҳалок бўлди
Запорожье яқинида тинч аҳолидан иборат гуманитар карвоннинг ўққа тутилиши оқибатида камида 23 киши ҳалок бўлди, яна 28 киши жароҳатланди, деб хабар бермоқда Meduza.
Украинанинг Запорожье вилояти ҳарбий маъмурияти раҳбари Александр Старухнинг маълум қилишича, 30 сентябрь куни эрталаб Россия ҳарбийлари автомобиллар карвонига ракета ҳужуми уюштирган.
«Одамлар ўз қариндошларини олиб кетиш ёки уларга ёрдам кўрсатиш учун вақтинча босиб олинган ҳудудга киришда навбат кутиб турган эди», — деди у ўзининг Telegram каналида.
Ўзбекистон қатор нуфузли халқаро рейтинглардаги ўрнини сезиларли даражада яхшилади
Ўзбекистон нуфузли халқаро рейтинглардаги ўрнини сезиларли даражада яхшилади. Бу ҳақда АОКАда ўтказилган брифингда Адлия вазирлиги ахборот хизмати раҳбари маълум қилди.Ўзбекистон қуйидаги рейтингларда юқорилади:
- «Ҳукумат самарадорлиги» кўрсаткичида 22 поғонага кўтарилди;
- «Сиёсий барқарорлик ва зўравонлик/терроризмнинг мавжуд эмаслиги» кўрсаткичида 19 поғонага ўсди;
- «Тартибга солиш сифати» йўналишида 33 поғонага ўсди;
- «Коррупцияни тийиб туриш» индикаторидаги натижаси 15 поғонага яхшиланди;
- «Ҳуқуқ устуворлиги» йўналишида 13 поғонага кўтарилди;
- «Аҳоли фикрини ҳисобга олиш ва ҳисобдорлик» кўрсаткичи бўйича 12 поғона юқорилади.
Суриянинг 10 та вилоятида вабо авж олди ва бутун мамлакат бўйлаб тарқалиб бормоқда, вазият хавотир уйғотяпти, дея маълум қилди Жаҳон соғлиқни сақлаш ташкилоти (ЖССТ)нинг Вабо ва эпидемик диарея касалликлари бўйича гуруҳи раҳбари Филипп Барбоза.
«28 сентябрь ҳолатига Сурия Соғлиқни сақлаш вазирлиги ўнта вилоятда вабо авж олганини маълум қилди, 426 кишида касаллик аниқланиб, шуларнинг 33 нафари вафот этган. Касаллик тарқалган ҳудудларда вазият ташвишга соладиган даражада тез ривожланмоқда ва янги-янги ҳудудларга тарқалмоқда», — деди у Женевада БМТ брифинги чоғида.
