Тошкентда номаълум эркак ва аёл дренаж панжараларини ўғирлади
Ижтимоий тармоқларда номаълум эркак ва аёл Тошкентнинг Абай кўчасида ўрнатилган дренаж панжараларини ўғирлагани акс этган видео тарқалиб, кўплаб муҳокамаларга сабаб бўлмоқда. Пойтахт ИИББ уларнинг шахсини аниқлаш чоралари кўрилаётганини маълум қилди.
Қайд этилишича, 26 сентябрь куни Шайхонтоҳур тумани ИИО ФМБга 44 ёшли Т.З. ариза билан мурожаат қилиб, Абай кўчасидаги бетон ариқча устига ўрнатилган дренаж панжаралар йўқолганини, уларни топишда амалий ёрдам беришни сўраган.
Тезкор тадбир давомида воқеа жойида ўрнатилган видеокузатув камера ёзувлари ўрганилган. Маълум бўлишича, шахсига аниқлик киритилаётган эркак ва аёл Matiz’га мазкур темир панжараларни ортиб кетгани аниқланган.
«Ҳозирда ўғриликда гумон қилинаётган шахсларни аниқлаш бўйича тезкор тадбирлар давом эттирилиб, терговга қадар текширувлар ўтказилмоқда. Унинг натижаларига кўра қонуний қарор қабул қилинади», — дейилади хабарда.
