Нукус ва Урганчдаги ҳарбий округларда техникаларни қишки мавсумга ҳозирлаш ишлари бошланди (фото)
Шимоли-ғарбий ҳарбий округда қўшинлардаги энг масъулиятли тадбирлардан бири – қурол-яроғ ва ҳарбий техникаларни қишки мавсумда фойдаланиш режимига ўтказишдан олдин кўргазмали машғулот ташкил этилди. Бу ҳақда ҳарбий округ матбуот хизмати «Дарё»га маълум қилди.
Қорақалпоғистон ҳамда Хоразм вилояти мамлакатнинг шимоли-ғарбий томонида жойлашгани боис қишнинг совуқ кунлари бошқа ҳудудларга қараганда бу ерда барвақт келиши кутилади. Шу учун Нукус ва Урганч гарнизонларида жойлашган ҳарбий қисм ва муассасаларда жанговар ва ҳарбий техника ҳамда қурол-яроғларни ёзги мавсумдан қишки мавсумда фойдаланиш учун ҳозирлаш бошқа ҳарбий округларга қараганда олдин бошланади.
Мазкур комплекс тадбирлар ҳарбий техника ва қурол-аслаҳаларни юқори жанговар шайлик даражасида ушлаб туриш ҳамда об-ҳавонинг совуқ шароитда фойдаланишга ҳозирлаш учун ўтказилади.
Нукус гарнизонидаги ҳарбий қисмларнинг бирида қурол-яроғ ва ҳарбий техникаларни мавсумий фойдаланиш режимига ўтказиш бўйича ташкил этилган кўргазмали машғулотда Шимоли-ғарбий ҳарбий округ қўшинлари қўмондони полковник Фарҳод Шерматов, округ қўмондонлиги ҳамда Нукус ва Урганч гарнизонларидаги ҳарбий қисмларнинг ҳарбий хизматчилари иштирок этди.
Тадбирда ҳарбий техника ва қурол-аслаҳаларнинг жанговар шайлигини таъминлаш, уларни соз ҳолатда сақлашда кўрсатилаётган техник хизматларнинг аҳамияти таъкидланди. Ҳар бир командир, ҳар бир ҳарбий хизматчи ўзига бириктирилган қурол-яроғ ва ҳарбий техниканинг соз ва шайлиги учун масъул экани эслатилди.
Кўргазмали машғулотни ташкил этиш учун ҳарбий қисмнинг жанговар ва ҳарбий техникаларни сақлаш паркида 8 та ўқув жойи ва 25 ўқув нуқтаси ташкил этилди. У ерда жанговар машина, танк, зирҳли транспортёр, зенит-артиллерия қурилмалари, махсус техника, қурол-яроғ ва бошқа техникаларни қишки шароитда фойдаланиш режимига ўтказиш ишларининг моҳияти, техника хавфсизлиги қоидаларига риоя этиш, ташкил этилган постларда самарали ва сифатли иш олиб бориш, қурол-яроғ ва техникани об-ҳавонинг ҳарорати паст шароитларда ишлатиш қоидалари, жароҳатланганларга биринчи тиббий ёрдам кўрсатиш бўйича мутахассислар томонидан йўриқномалар берилди. Техникаларга техник хизмат кўрсатиш бўйича кўргазмали тарзда ишлар намойиш этилди.
Мазкур тадбирларни бажаришда технологик хариталарга кўра ҳарбий қисмлардаги техникаларда совитиш суюқликлари алмаштирилади, ҳар бир жанговар машина агрегат ва тугунлари текширилади, фильтрларни тозалаш ва алмаштириш ишлари ўтказилади, ёнилғи-мойлаш ашёлари янгисига ўзгартирилади, электр ва алоқа жиҳозларининг созлиги назоратдан ўтказилади.
Маълумот учун, Мудофаа вазирлиги қўшинларида қурол-аслаҳа ва ҳарбий техникаларни мавсумий фойдаланиш режимларига ўтказиш йилига икки маротаба – баҳор ва кузда ташкил этилади.
Тадбир режасига кўра октябрь ойининг охиригача Шимоли-ғарбий ҳарбий округ қўшинларидаги мавжуд қурол-аслаҳа ва ҳарбий техникаларнинг барчаси қишки мавсумда фойдаланиш учун шай ҳолатга келтирилади.
