Литва ўзбекистонлик юк ташувчиларга виза тартибини соддалаштириши мумкин

23 сентябрь куни Транспорт вазирлигида Литва Ташқи ишлар вазирлиги делегацияси вакиллари билан учрашув бўлиб ўтди, деб хабар бермоқда «Дунё» ахборот агентлиги.

Қайд этилишича, транспорт вазири ўринбосари Абдусамат Мўминов ҳамда Литва ташқи ишлар вазири ўринбосари Мантас Адоменас бошчилигида бўлиб ўтган учрашувда транспорт соҳасидаги ҳамкорлик алоқаларини ривожлантириш масалалари муҳокама этилди.

Ҳар икки томон вакиллари мамлакатлар ўртасида транспорт ва логистика йўналишида ҳамкорлик алоқаларини янги босқичга олиб чиқиш учун барча шароитлар мавжуд эканини, имкониятлардан самарали фойдаланиш ҳар икки томон учун ҳам манфаатли эканини алоҳида таъкидлаган.

Учрашувда жорий йил якунига қадар халқаро автомобиль ташувлари масалалари бўйича қўшма комиссия йиғилишини ўтказишга, 2023 йилнинг биринчи ярмида Литва транспорт ва коммуникация вазирининг Тошкентга ташрифини ташкил этишга келишиб олинган.

Томонлар, шунингдек, миллий ташувчиларга виза тартибини соддалаштириш билан боғлиқ масалалар хусусида фикр алмашган.

Бўлиб ўтган мулоқот натижасида муҳокама қилинган ҳамкорлик йўналишлари доирасида келгусида амалга ошириладиган вазифалар белгилаб олинган.