Putin chegaradagi vaziyat yuzasidan Tojikiston va Qirg‘iziston prezidentlari bilan muzokaralar o‘tkazdi

Rossiya prezidenti Vladimir Putin 18-sentabr kuni Qirg‘iziston va Tojikiston rahbarlari Sadir Japarov va Emomali Rahmon bilan telefon orqali suhbatlashdi, deb yozadi Asia Plus Kreml bayonotiga tayanib.

“Vladimir Putin tomonlarni vaziyatning yanada keskinlashishiga yo‘l qo‘ymaslikka va uni faqat tinch, siyosiy-diplomatik vositalar bilan tezroq tartibga solishga chaqirdi, Rossiya qirg‘iz-tojik chegarasida barqarorlikni ta’minlash maqsadida zarur yordamni ko‘rsatishga tayyorligini tasdiqladi”, — deyiladi Rossiya yetakchisi matbuot xizmati xabarida.

Tojikiston prezidenti matbuot xizmati ma’lum qilishicha, suhbat chog‘ida Emomali Rahmon va Vladimir Putin ikki tomonlama aloqalarga oid dolzarb masalalarni muhokama qilgan.

“Tomonlarning diqqat markazida Tojikiston va Qirg‘izistonning chegaradosh hududlarida yuzaga kelgan holat fonida Markaziy Osiyoda vaziyatning rivojlanishi masalalari bo‘ldi”, — deyiladi xabarda.

Shuningdek, Putin Qirg‘iziston prezidenti Sadir Japarov bilan telefon orqali suhbatlashgan.

Avvalroq AQSH Davlat departamenti Dushanbe va Bishkekni chegarada o‘t ochishni to‘xtatish rejimiga amal qilishga chaqirgandi.

“Biz tojik-qirg‘iz chegarasidagi to‘qnashuvlar haqida kelib tushayotgan xabarlardan xavotirdamiz. Tinch aholining hayoti xavf ostida, va biz jabrlanganlarga hamdardligimizni izhor etamiz. Ikkala tomonni ham o‘t ochishni to‘xtatish rejimiga rioya qilishga va tinchlikni diplomatik yo‘l bilan qayta tiklash bo‘yicha sa’y-harakatlarni ikki baravar oshirishga chaqiramiz”, — deb yozdi Davlat departamenti matnuot kotibi Ned Prays o‘z Twitter’ida.

Qirg‘iziston va Tojikiston chegarasidagi keng ko‘lamli jangovar to‘qnashuvlar 16-sentabr kuni ertalab boshlandi. Tomonlar bir-birini o‘t ochishda aybladi. Ikki mamlakat harbiylari o‘rtasidagi kuchli janglar butun chegara bo‘ylab kun bo‘yi davom etdi. Yarim tunga kelibgina, o‘t ochishni to‘xtatishga muvaffaq bo‘lishdi.

17-sentabr kuni tongda to‘qnashuvlar qayta boshlandi. Tomonlar bir-birini o‘t ochishni to‘xtatish haqidagi bitimni buzganlikda aybladi. Kechga kelib, otishmalar to‘xtadi.

Tojikiston Tashqi ishlar vazirligi 18-sentabr kungi xabarida tojik-qirg‘iz chegarasidagi nizoda 28 kishi halok bo‘lganini ma’lum qildi.

Qirg‘iziston esa 46 kishi chegardagi ziddiyatlar qurboniga aylanganini xabar qildi.