Россия фонд биржасида акцияларнинг арзонлашиши кузатилмоқда, инвесторлар Россия иқтисодиётининг қулашидан хавотирланмоқда. Иқтисодчи эксперт Абдулла Абдуқодиров «Дарё»га ҳолат юзасидан ўз муносабатини билдирди.
«Хабарингиз бор, Луганск ва Донецк ўзининг Россия ҳудудига киришига псевдореферендум ўтказмоқчи бўлиб, шу ҳақда Россия ҳукуматига мурожаат қилди. Ўз навбатида, Россия давлат думаси Жиноят кодексига турли-туман: ҳарбий ҳолат, мобилизация каби ўзгартиришлар киритди. Уларда урушга чақирилган ёки мобилизация вақтида ҳарбий хизматга чақирилганлар бир ой мобайнида ҳарбий комиссариатга келмаса, қандай жазолар қўлланиши жуда қаттиқ белгиланди. Жарима жазоси турли реал қамоқ чоралари билан алиштирилди», — деб фикрларини бошлади иқтисодчи.
Унинг фикрича, Россия бу ҳаракатлари билан ЛХР ва ДХРни ўз ҳудудига қўшиб олиш, уларни Россия ҳудуди деб эълон қилиш ва ушбу ҳудудга бўладиган Украина ҳарбий ҳужумларини «Россия ҳудудига ҳужум» деб эълон қилиш, шунга қарши мобилизация қилиш учун ҳуқуқий асос тайёрлаяпти.
Ўйлайманки, мобилизациянинг уруш бошланганидан 7 ой ўтиб, жуда шошилинч равишда амалга оширилиши уруш майдонида деярли ҳеч нарсани ўзгартирмайди. Бу — Россия сиёсий тизимидаги катта хато.Биринчидан, Россия иқтисодининг орқага кетишига шароит яратиб беради. Мамлакатнинг ўзида ижтимоий бўлинишлар, урушга қарши норозиликларнинг ошишига сабаб бўлади. Чунки урушни телевизорда кўриб туриб қўллаб-қувватлаш бошқа нарса; бевосита жанг майдонига бориш, ака-укаси, фарзандининг қурбон бўлишини кўриш — бутунлай бошқа нарса.
Иккинчидан, хўп, майли, мобилизация қилиб, катта армия тўплаб, урушга сафарбар қилди ҳам дейлик. Лекин бу уруш қандай қурол билан амалга оширилади? Илгариги Совет тактикасидек фақат катта қурбонлар ҳисобига уришилса, ўлимлар сони ошиб бораверади. Бу жуда бир катта принципиал ўзгаришга олиб келмайди уруш натижаларида.
Бунинг қай даражада катта хато эканини тарих кўрсатади. Лекин менинг диққатимни тортгани — бу Путиннинг Самарқанд саммитида иштирок этиб қайтгандан кейин қилаётган ишларидан биттаси. Ўтган ҳафта ШҲТ саммити доирасида Путин турли давлат раҳбарлари билан учрашиб, урушни тугатиш бўйича аниқ сигнал олди. Лекин у урушни тугатиш ўрнига яна эскалацияга боряпти. Бу дунё лидерлари томонидан жуда ёмон қабул қилинади, — дейди Абдулла Абдуқодиров.
Маълумот учун, Россия иқтисодиёти ҳам бу янгиликни жуда ёмон қабул қилди. Тошкент вақти билан 17:10 да Москва биржаси индексининг тушиши деярли 11 фоизни ташкил этган. Газпромнинг акциялари 18 фоизга тушган.
Фонд котировкаларининг тушиш иқтисодиёт учун зарар эмас. Агар уни кимдир соца ёки сотиб олса, ана ўшанда бу ютди, бу ютқизди, деб айтиш мумкин. Котировкаларнинг пасайиши иқтисодчиларнинг Россия иқтисодиётига, асосий компанияларининг молиявий барқарорлигига ишончи йўқлигини билдирадиган кўрсаткич, холос», — дея фикрларига якун ясади иқтисодчи.
Изоҳ (0)