Rossiya fond birjasida aksiyalarning arzonlashishi kuzatilmoqda, investorlar Rossiya iqtisodiyotining qulashidan xavotirlanmoqda. Iqtisodchi ekspert Abdulla Abduqodirov “Daryo”ga holat yuzasidan o‘z munosabatini bildirdi.
“Xabaringiz bor, Lugansk va Donetsk o‘zining Rossiya hududiga kirishiga psevdoreferendum o‘tkazmoqchi bo‘lib, shu haqda Rossiya hukumatiga murojaat qildi. O‘z navbatida, Rossiya davlat dumasi Jinoyat kodeksiga turli-tuman: harbiy holat, mobilizatsiya kabi o‘zgartirishlar kiritdi. Ularda urushga chaqirilgan yoki mobilizatsiya vaqtida harbiy xizmatga chaqirilganlar bir oy mobaynida harbiy komissariatga kelmasa, qanday jazolar qo‘llanishi juda qattiq belgilandi. Jarima jazosi turli real qamoq choralari bilan alishtirildi”, — deb fikrlarini boshladi iqtisodchi.
Uning fikricha, Rossiya bu harakatlari bilan LXR va DXRni o‘z hududiga qo‘shib olish, ularni Rossiya hududi deb e’lon qilish va ushbu hududga bo‘ladigan Ukraina harbiy hujumlarini “Rossiya hududiga hujum” deb e’lon qilish, shunga qarshi mobilizatsiya qilish uchun huquqiy asos tayyorlayapti.
O‘ylaymanki, mobilizatsiyaning urush boshlanganidan 7 oy o‘tib, juda shoshilinch ravishda amalga oshirilishi urush maydonida deyarli hech narsani o‘zgartirmaydi. Bu — Rossiya siyosiy tizimidagi katta xato.Birinchidan, Rossiya iqtisodining orqaga ketishiga sharoit yaratib beradi. Mamlakatning o‘zida ijtimoiy bo‘linishlar, urushga qarshi noroziliklarning oshishiga sabab bo‘ladi. Chunki urushni televizorda ko‘rib turib qo‘llab-quvvatlash boshqa narsa; bevosita jang maydoniga borish, aka-ukasi, farzandining qurbon bo‘lishini ko‘rish — butunlay boshqa narsa.
Ikkinchidan, xo‘p, mayli, mobilizatsiya qilib, katta armiya to‘plab, urushga safarbar qildi ham deylik. Lekin bu urush qanday qurol bilan amalga oshiriladi? Ilgarigi Sovet taktikasidek faqat katta qurbonlar hisobiga urishilsa, o‘limlar soni oshib boraveradi. Bu juda bir katta prinsipial o‘zgarishga olib kelmaydi urush natijalarida.
Buning qay darajada katta xato ekanini tarix ko‘rsatadi. Lekin mening diqqatimni tortgani — bu Putinning Samarqand sammitida ishtirok etib qaytgandan keyin qilayotgan ishlaridan bittasi. O‘tgan hafta SHHT sammiti doirasida Putin turli davlat rahbarlari bilan uchrashib, urushni tugatish bo‘yicha aniq signal oldi. Lekin u urushni tugatish o‘rniga yana eskalatsiyaga boryapti. Bu dunyo liderlari tomonidan juda yomon qabul qilinadi, — deydi Abdulla Abduqodirov.
Ma’lumot uchun, Rossiya iqtisodiyoti ham bu yangilikni juda yomon qabul qildi. Toshkent vaqti bilan 17:10 da Moskva birjasi indeksining tushishi deyarli 11 foizni tashkil etgan. Gazpromning aksiyalari 18 foizga tushgan.
Fond kotirovkalarining tushish iqtisodiyot uchun zarar emas. Agar uni kimdir sotsa yoki sotib olsa, ana o‘shanda bu yutdi, bu yutqizdi, deb aytish mumkin. Kotirovkalarning pasayishi iqtisodchilarning Rossiya iqtisodiyotiga, asosiy kompaniyalarining moliyaviy barqarorligiga ishonchi yo‘qligini bildiradigan ko‘rsatkich, xolos”, — deya fikrlariga yakun yasadi iqtisodchi.
Izoh (0)