Иқтисодиёт инқирозда: Нигерияда доллар танқислиги кузатилмоқда

Нақд доллар етишмаслиги Нигерия иқтисодини инқирозга олиб келди. Бу ҳақда Financial Times хабар бермоқда. 

Мамлакат расмийлари томонидан миллий валюта наирадан фойдаланишни рағбатлантириш мақсадида валюта операцияларига киритилган чекловлар туфайли бир неча ойдирки, Нигерияда долларнинг кескин тақчиллиги кузатилмоқда. 

Ҳукумат доллар сотиб олишни чеклаб қўйди ва нефть экспортининг қисқаришидан тушадиган даромадни ошириш учун наирани бир неча бор девальвация қилди.

Йил бошидан бери нефть захиралари бўйича дунёда ўнинчи ўринни эгаллаган Нигериянинг олтин-валюта захиралари 5 фоизга камайиб, 38 миллиард долларни ташкил этди. 

Оммавий коррупция ва самарасиз иқтисодий чоралар нефтга бой Нигерия ушбу товар экспортини ошира олмаслигига олиб келди — агар Нигерия учун ОПЕК квотаси кунига 1,8 млн баррель бўлса, у ҳолда мамлакат атиги 1,1 млн баррелни экспорт қилади.

Нигерияда доллар тақчиллиги хорижлик ҳамкорлар, маҳаллий инвесторлар ва фарзандлари хорижий таълим муассасаларида таҳсил олаётган фуқаролар билан иш олиб борувчи маҳаллий компанияларга энг кўп таъсир қилади. Уларнинг барчасида ҳисоб-китобларни тўлаш учун валюта топиш жуда қийин. 

Маълум қилинишича, Emirates авиакомпанияси Нигерия пойтахти Лагосга парвозларини тўхтатиб қўйиш билан таҳдид қилган, чунки бу авиакомпания мамлакатдаги фаолияти учун Нигерия Марказий банки томонидан ажратилган зарур 464 миллион доллар ўрнига атиги 265 миллион доллар олишга муваффақ бўлган.