Дунёдаги энг йирик кофе етказиб берувчи Бразилияда қурғоқчилик туфайли кофе захиралари жорий йилнинг баҳорида тарихий энг паст даражага етиши мумкин. Бу ҳақда Бразилия Миллий қаҳва кенгаши раҳбари Силас Брасилейрога асосланиб, Bloomberg агентлиги хабар берди.
Унинг сўзларига кўра, март ойигача мамлакатдаги кофе захиралари оғирлиги 60 кг бўлган 7 миллион қопгача камайиши мумкин, энг қулай даража эса 9-12 миллион қоп бўлади.
Бутун дунёда қаҳвага бўлган глобал талаб ўсишда давом этмоқда, истеъмол бу йил 1,5 фоиз ва ўтган йили 2 фоизга ошган.
Талаб ошгани сайин нархлар ҳам ошади. Агентликнинг қайд этишича, Нью-Йоркда Арабиcа кофе фьючерслари нархи йилига 11 фоизга ошган ва таҳлилчилар бу жараён давом этишига ишонмоқда.
Глобал нархлар ўсишда давом этади ва Бразилия етказиб беришидаги ноаниқлик бунинг сабабларидан биридир, — деди Голландиядаги Рабобанк банкининг катта иқтисодий таҳлилчиси Гуилерме Мория.
Нашрнинг фикрича, яқин келажакда вазият ўзгармайди. Ноқулай об-ҳаво Гватемала, Гондурас ва Никарагуадаги қаҳва плантацияларига ҳам таҳдид солмоқда.
2022 йилнинг январь—июль ойларида Ўзбекистон хорижий давлатлардан қиймати 1,8 миллион долларга тенг бўлган 257,2 тонна кофе маҳсулотларини импорт қилган.
Жорий йилнинг илк етти ойида Ўзбекистон энг кўп қаҳва экспорт қиладиган давлатлар орасида Бразилия 45 тонна билан иккинчи ўринни эгаллади.
Бразилиядаги қаҳва захираларининг кескин пасайиши, Ўзбекистоннинг бошқа муқобил бозорларни излашига туртки бўлиши мумкин.
Изоҳ (0)