Украина 2023 йилда бюджетнинг деярли ярмини мудофаа учун ажратади

2023 йилда Украина давлат бюджетидан мудофаа ва хавфсизлик секторига маблағларнинг қарийб ярми (1 триллион 136 миллиард гривна) ажратилади, яна 35 фоизи (800 миллиард гривнадан зиёд) эса ижтимоий ҳимоя дастурига — пенсиялар, субсидиялар, нафақалар тиббиёт ва таълимга харажатларга йўналтирилади. Бу ҳақда Украина бош вазири Денис Шмигал ҳукумат мажлисида эълон қилди, деб ёзади «РБК».

Мудофаа сектори учун харажатларга ҳарбийларнинг маошлари, армия таъминоти, техника ва қурол-яроғ таъмири ва харидлари ҳамда бошқалар киради, дея аниқлаштирди у. Украина ҳукумати раҳбарига кўра, ўтган йил билан таққослаганда, хавфсизлик ва мудофаа учун режалаштирилган харажатлар тўрт баробардан кўпроқ ошган.

Келаси йил учун давлат бюджети лойиҳаси доирасида Украина ҳукумати камида 19 миллиард гривна ҳажмида Жанговар ҳаракатлар оқибатларини бартараф этиш фондини яратишга қарор қилди. Мусодара этилган Россия активлари ва халқаро кўмак ҳам шунга йўналтирилади. Шунингдек, минтақаларга жанговар ҳаракатлар билан боғлиқ харажатларни қоплаш учун 24 миллиард гривна миқдорида қўшимча дотация кўзда тутилган.

Қолган барча харажатлар қисқартирилади. Мансабдорлар камайтирилади ҳамда уларнинг маош ва мукофот пуллари кесилади; куч тузилмаларидан ташқари ҳукумат органларига харажатлар 2022 йилга нисбатан 11,6 миллиард гривнага камаяди.

Бош вазир сўзларига кўра, 2023 йилда Украинанинг даромади 1,28 триллион гривнага тенг бўлади, харажатлар эса 2,57 триллион гривна ҳажмида режалаштирилган, ҳар ойлик бюджет танқислиги 3 миллиард доллардан ошади.