Бугун,

  • USD 10940.05
  • RUB 182.26
  • EUR 11121.65

Ривожланган иқтисодиёт — ривожланган давлат дегани. Замонавий рақобат майдонида иқтисодиётнинг ўсиши илм-фан асосида оригинал маҳсулотлар ишлаб чиқарилишига боғлиқ. Инновациялар эса иқтисодиётда бозор ривожланишини тезлаштирувчи омил ҳисобланади. Бунда янгиланган қарашлар ҳамда ташаббусларга эга ёшларнинг билимидан фойдаланиш айни муддаодир.

Бугун Ўзбекистон ҳам ўз инновацион ғоялари ва тадбиркорлик ташаббуслари билан халқаро иқтисодий муносабатларда фаоллашиб бормоқда.

Юртимизнинг турли ҳудудларида яшаётган иқтидорли, ташаббускор ёш олимлар ва тадбиркорлар фаолияти кўпчилик учун қизиқ. Шундан келиб чиқиб «Дарё» ижодий жамоаси Ўзбекистон Инновацион ривожланиш вазирлигида бўлиб, репортаж тайёрлади.

«Иқтидорли ёшлар бўлса, биз уларни барча техникалардан фойдаланиш текин бўлган Иннотехнопаркимизда кутамиз. Бу ерда биз янги технологиялар ишлаб чиқаришни ўргатиш баробарида уни ҳаётга татбиқ этиш йўлларини кўрсатамиз», — деди Иннотехнопарк резиденти Элёр Суннатов.

Шунингдек, Стартап экотизимини шакллантириш ва ривожлантириш бошқармаси бошлиғи Азизбек Илҳомов ҳам ўз фикрларини билдириб ўтди: «Стартап лойиҳаларимиз доирасида биринчи қалдирғочларимиз умумий қийматда 20 млрд дан ортиқ даромадга чиқиб бўлган. Ажратилган маблағларнинг барчаси беғараз давлат гранти ҳисобланади».

«Ортиқча вазн ёки қандли диабет касаллиги бизда кўп учрайди. Озиқ-овқат маҳсулотлари уларга тўғридан-тўғри таъсир кўрсатади. Илмий ёндашувлар билан чорва молларини тўғри озиқалантиришни бошлаш, катта муаммоларни ечишга ёрдам беради», — дейди Калифорния штатининг Сан-Диэго шаҳрида илмий стажировка ўтаб келган ёш олим Сарвар Қаҳҳоров.

Юқоридаги фикрлардан келиб чиқадиган бўлсак, ёш олимлар ва тадбиркорларнинг инновацион ғояларини рағбатлантириш Ўзбекистон иқтисодиётини янги босқичга олиб чиқиш учун муҳим омил бўлиб хизмат қилиши мумкин.

Изоҳ
Асосий янгиликлар