Rivojlangan iqtisodiyot — rivojlangan davlat degani. Zamonaviy raqobat maydonida iqtisodiyotning o‘sishi ilm-fan asosida original mahsulotlar ishlab chiqarilishiga bog‘liq. Innovatsiyalar esa iqtisodiyotda bozor rivojlanishini tezlashtiruvchi omil hisoblanadi. Bunda yangilangan qarashlar hamda tashabbuslarga ega yoshlarning bilimidan foydalanish ayni muddaodir.
Bugun O‘zbekiston ham o‘z innovatsion g‘oyalari va tadbirkorlik tashabbuslari bilan xalqaro iqtisodiy munosabatlarda faollashib bormoqda.
Yurtimizning turli hududlarida yashayotgan iqtidorli, tashabbuskor yosh olimlar va tadbirkorlar faoliyati ko‘pchilik uchun qiziq. Shundan kelib chiqib “Daryo” ijodiy jamoasi O‘zbekiston Innovatsion rivojlanish vazirligida bo‘lib, reportaj tayyorladi.
“Iqtidorli yoshlar bo‘lsa, biz ularni barcha texnikalardan foydalanish tekin bo‘lgan Innotexnoparkimizda kutamiz. Bu yerda biz yangi texnologiyalar ishlab chiqarishni o‘rgatish barobarida uni hayotga tatbiq etish yo‘llarini ko‘rsatamiz”, — dedi Innotexnopark rezidenti Elyor Sunnatov.
Shuningdek, Startap ekotizimini shakllantirish va rivojlantirish boshqarmasi boshlig‘i Azizbek Ilhomov ham o‘z fikrlarini bildirib o‘tdi: “Startap loyihalarimiz doirasida birinchi qaldirg'ochlarimiz umumiy qiymatda 20 mlrd dan ortiq daromadga chiqib bo'lgan. Ajratilgan mablag‘larning barchasi beg‘araz davlat granti hisoblanadi”.
“Ortiqcha vazn yoki qandli diabet kasalligi bizda ko‘p uchraydi. Oziq-ovqat mahsulotlari ularga to‘g‘ridan-to‘g‘ri ta‘sir ko‘rsatadi. Ilmiy yondashuvlar bilan chorva mollarini to‘g‘ri oziqalantirishni boshlash, katta muammolarni yechishga yordam beradi”, — deydi Kaliforniya shtatining San-Diego shahrida ilmiy stajirovka o‘tab kelgan yosh olim Sarvar Qahhorov.
Yuqoridagi fikrlardan kelib chiqadigan bo‘lsak, yosh olimlar va tadbirkorlarning innovatsion g‘oyalarini rag‘batlantirish O‘zbekiston iqtisodiyotini yangi bosqichga olib chiqish uchun muhim omil bo‘lib xizmat qilishi mumkin.
Izoh (0)