Ўзбекистонда 2022 йилда барча тоифа хўжаликларида 63 минг гектар майдонга қовун экилган бўлиб, шундан 51,5 минг гектари фермер ва қишлоқ хўжалиги корхоналари ҳиссасига тўғри келади. Бу ҳақда Қишлоқ хўжалиги вазирлиги хабар берди.
Ушбу экилган майдонлардан жорий йилда жами 1,3 млн тонна қовун етиштириш режалаштирилган. Шундан 1 млн тонна қовун фермер ва қишлоқ хўжалиги корхоналарига тўғри келади.
Халқ селексиясида қовуннинг 150 дан ортиқ навлари мавжуд. Ўзбекистонда ҳандалак, ёзги эти юмшоқ, ёзги эти қаттиқ, кузги, қишда сақланадиган қовун турлари экилади.
Жумладан, ҳандалакларнинг кўкча, маҳаллий, кўк каллапўш, бўрикалла каби навлари мавжуд.
«Кўкча ҳандалак» эртапишар нав бўлиб, унинг экилишидан токи пишиб етилгунгача даври 58-62 кунни ташкил этади.
Ясси япалоқсимон кўринишдаги кул ранг, яшил қовуннинг устки қисми майда сийрак тўр билан қопланган.
Пўсти юмшоқ, хўшбўй, еганда таъми оғизда қоладиган кўкча ҳандалакдан гектарига 15-19 тоннагача ҳосил олиш мумкин. Қовуннинг вазни 1,3 килограммгача бўлади.
Ёзги эти юмшоқ қовунлар саратонда қуёшнинг беминнат нурларига тўйиб, таъми ҳам ўзгача бўлиши билан ажралиб туради.
Аввалроқ Ўзбекистонда қовун етиштириш бўйича етакчи ҳудудлар маълум бўлган эди.
Изоҳ (0)