Россиянинг «Росатом» давлат корпорацияси Ўзбекистон Фанлар академияси Ядро физикаси институти билан тузилган шартнома асосида Ўзбекистондаги тадқиқот реактори учун инновацион ядро ёнилғисини етказиб беради. Бу ҳақда компания матбуот хизматига таяниб «ТАСС» хабар бермоқда.
Ўзбекистонга ядро ёқилғиси етказиб бериш 2022 ва 2023 йилларда ёнилғи компанияси томонидан амалга оширилади, — дейилади хабарда.
Ўзбекистондаги WWR-SM реактори учун россиялик ядро олимлари зич уран ва уран-силицид ёнилғисини етказиб беради.
Бу Ўзбекистонга илгари етказиб берилган стандарт IRT-4M ёнилғи комплектларидан ўз хусусиятлари билан фарқ қилади.
WWR-SM реактори ядро физикаси, радиацион материалларшунослик, фаоллашув таҳлили, минералларни нурлантириш, шунингдек, тиббий ва саноат мақсадларида радиоизотоплар ишлаб чиқариш соҳасидаги тадқиқотлар учун ишлатилади.
Ушбу иншоот учун Россия ядро ёқилғисини етказиб бериш бўйича аввалги шартнома 2017 йилнинг ноябрида Тошкентда икки давлат бош вазирлари иштирокида имзоланган эди.
2017 йил декабрь ойида Россия ва Ўзбекистон ҳукуматлари атом энергиясидан тинч мақсадларда фойдаланиш тўғрисидаги битимни имзолаган эди.
2019 йил февраль ойида Ўзбекистон президенти Шавкат Мирзиёев 2019—2029 йилларда атом энергетикасини ривожлантириш концепциясини тасдиқлаган эди.
Изоҳ (0)