Россия Мудофаа вазирлиги қўшинларининг Харьков вилоятидан чекиниши акс этган харитани кўрсатди. Улар назоратида кичик ҳудуд қолган

Россия Мудофаа вазирлиги журналистлар учун кундалик брифингда 11 сентябрь ҳолатига кўра, Украинанинг Харьков вилоятидаги қайси ҳудудлар Россия қўшинлари томонидан назорат қилинаётганини кўрсатди.

Тақдим этилган харитадан маълум бўлишича, Харьков вилоятининг шарқида, Оскол дарёси бўйлаб кичик бир ҳудуд Россия назорати остида бўлиб турибди (бу ҳудуд пушти ранг билан белгиланган).

Аввалги куни, 10 сентябрдаги брифингда кўрсатилган харита билан солиштирганда, Россия ҳарбийлари Харьков вилояти шимолидан чекинганини, хусусан, Россия билан чегарадаги Волчанск шаҳрини тарк этганини кўриш мумкин (у ерни рус армияси урушнинг биринчи кунида эгаллаган эди). Волчанскда аллақачон Украина байроғи пайдо бўлган.

Сентябрь ойи бошида Украина армияси Харьков вилоятига қарши ҳужумга ўтди, шундан сўнг рус қўшинлари чекинишни бошлади. Россия Мудофаа вазирлиги чекинишга изоҳ берар экан,  «Донецк йўналишидаги саъй-ҳаракатларни кучайтириш» учун Харьков вилоятидан «қўшинларни қисқартириш ва кўчириш операцияси» бўлаётганини эълон қилди. 11 сентябрь куни Харьков вилояти раҳбари Олег Синегубов Украина ҳарбийлари минтақадаги 40 дан ортиқ аҳоли пунктларини озод қилганини айтди.

11 сентябрь куни Украина Қуролли кучлари бош қўмондони Валерий Залужний сентябрь бошидан бери Украина армияси мамлакатнинг уч минг квадрат километрдан ортиқ ҳудудини қайтариб олганини маълум қилди. Америка Урушни ўрганиш институти (ISW) маълумотларига кўра, бу Россия армияси апрель ойидан бери оккупация қилган ҳудудлардан кўп.