Рамзан Қодиров Харьковдаги шаҳарлар устидан назоратни қайта тиклашга ваъда берди
Чеченистон раҳбари Рамзан Қодиров Россия Мудофаа вазирлигига қўшинларнинг Балаклея, Купянск ва Изюмдаги позициялардан олиб чиқиб кетилгани бўйича тушунтиришлари учун миннатдорлик билдирди, бироқ у россиялик ҳарбийлар тез орада йўқотилган позициялар устидан назоратни тиклашини ваъда қилди. Бу ҳақда сиёсатчи ўзининг Telegram-каналида гапирган.
Қодировнинг таъкидлашича, Харьков вилоятидаги позициялардан воз кечиш ҳарбийларнинг ҳаётини сақлаб қолиш учун зарурий чора эди, аммо «бу мутлақо ҳеч нарсани англатмайди».
Мен, Рамзан Қодиров сизга расман айтаманки, бу шаҳарларнинг барчаси қайтарилади. У ерда одамларимиз бор, йигитлар бу иш учун махсус қуролланган, яна 10 минг жангчи у ерга кетишга тайёр. Яқин орада Одессага ҳам етиб борамиз, — деди Қодиров.Унинг сўзларига кўра, бу йўналишда хатоларга йўл қўйилган, аммо қўмондонлик тегишли хулосалар чиқармоқда.
«Агар бугун ёки эрта махсус ҳарбий операция ўтказиш стратегиясига ўзгартириш киритилмаса, мен Мудофаа вазирлиги раҳбарияти, мамлакат раҳбарияти билан боғланиб, уларга ҳақиқатан у ерда содир бўлаётган вазиятни тушунтиришга мажбур бўламан», — деди у.
Шу ҳафтада Украина Қуролли кучлари Харьков вилоятининг босиб олинган ҳудудларида қарши ҳужумга ўтди. 8 сентябрда рус қўшинлари қамал хавфи остида Балаклея шаҳрини, 10 сентябрда эса Купянск шаҳрининг ғарбий қисми ва Изюм шаҳрини тарк этди.
10 сентябрь куни Россия Мудофаа вазирлиги биринчи марта Харьков вилоятидаги чекинишни тасдиқлади. Вазирлик буни «Донецк йўналишидаги саъй-ҳаракатларни кучайтириш» учун «қўшинларни қайта йиғиш бўйича операция» деб атади.
