Қирғизистонда пенсиялар миқдори кескин оширилди

Қирғизистон президенти Садир Жапаровнинг маълум қилишича, 1 октябрдан мамлакатда пенсиялар ўртача 1,7 мингдан 3,4 минг сомгача оширилади (тахминан 225—450 минг сўм). Бу ҳақда «Коммерсантъ» хабар бермоқда.

Тўловларни амалга ошириш учун ҳукумат ҳар йили бюджетдан ажратилган 70 миллиард сом ўрнига 90 миллиард сом (11,9 трлн сўм) ажратади.

Биз бу идеалдан узоқ эканини биламиз. Аммо бугунги бюджет имкониятларидан келиб чиқиб, фуқароларимиз ҳаётини яхшилаш учун ҳамма нарса қиляпмиз, — деди Жапаров.

Қирғизистон Пенсия жамғармасининг 2021 йилдаги маълумотларига кўра, мамлакатда 617 350 нафар пенсионер бор.

Ўртача пенсия миқдори 6 248 (тахминан 829 минг сўм) сомни ташкил этади. Қирғизистонда яшаш минимуми 5 840 (тахминан 775 минг сўм).

Сўнгги ўсиш 2021 йил октябрь ойида амалга оширилган ва 455 сом ( тахминан 60 минг сўм) ни ташкил қилган. Ёзда Қирғизистон Ижтимоий жамғармаси йил охиригача пенсияларни 50 фоизга индексация қилиш режасини эълон қилганди.

Аввалроқ Ўзбекистонда пенсия ва нафақа олувчилар сони қанчалиги ҳақида хабар берилганди.