Германия ҳукмрон коалицияси 65 миллиард евролик ёрдам пакети ҳақида келишиб олди, у инфляция ўсиши ва энергия харажатлари кўпайиши фонида фуқаролар ва компанияларни қўллаб-қувватлашга қаратилади, деб ёзади Meduza.
«Мамлакатимиз қийин даврларни бошидан ўтказмоқда. Биз ҳеч кимни ёлғиз қолдирмаймиз. Шу қишдан эсон-омон чиқамиз», — деди Германия канцлери Олаф Шольц матбуот анжуманида. Канцлер қўшимча қилишича, «Россия энди ишончли энергетик шерик бўлмай қолган».
Эълон қилинган ёрдам пакети доирасида 2022 йил 1 декабрдан пенсионерларга 300 евро, талабаларга эса 200 евро миқдорида бир марталик тўловлар берилади. Уй-жой нафақаси олиш ҳуқуқига эга бўлганлар иситиш тизими учун қўшимча 415 евро нафақани қўлга киритади. Уй-жой нафақаси олиш ҳуқуқига эга бўлган одамлар сони икки миллион кишига етказилади.
Шунингдек, Олаф Шольц маълум қилишича, Германия ҳукумати кўзда тутилмаган солиқлардан тушган даромадни якуний истеъмолчилар учун газ, нефть ва кўмир нархини пасайтириш учун ишлатмоқчи.
Ҳукумат аҳолини транспорт учун арзон чипталар билан таъминлашга 1,5 миллиард евро йўналтиради, шунингдек, энергия сиғими катта бўлган тўққиз мингта компанияга 1,7 миллиард евро миқдорида солиқ имтиёзларини тақдим этади. Германия Молия вазирлиги қайд этишича, янги ёрдам пакети қўшимча бюджет харажатларини талаб қилмайд.
Бу инфляцияга қарши курашга ёрдам беришга мўлжалланган учинчи пакет бўлиб, унинг ҳажми аввалги иккита пакетнинг биргаликдаги ҳажмидан ҳам кўпроқ. Германия ҳукумати ушбу чора-тадбирларга жами 95 миллиард доллар йўналтирган.
Германияда энергия инқирози 2 сентябрь куни «Газпром» Европага газ етказиб берган «Шимолий оқим» газ қувурини номаълум муддатга тўхтатиб қўйганидан кейин кучайиб кетди.
Изоҳ (0)