Навоий вилояти экология ва атроф-муҳитни муҳофаза қилиш бошқармаси ишонч телефонига 4 август куни Кармана туманида истиқомат қилувчи фуқаролар томонидан туман ҳудудидан оқиб ўтувчи Зарафшон дарёси қирғоқларида балиқларнинг кўплаб нобуд бўлгани бўйича мурожаат келиб тушди. Ушбу ҳолат юзасидан бошқарма томонидан тезкор равишда ишчи гуруҳ тузилиб, воқеа жойига бориб ўрганилди.
Ўрганиш давомида экология бошқармасининг 25 нафар инспектори жалб қилиниб, жами 829 дона (486 дона товонбалиқ, 113 дона сазан, 121 дона сом балиқ, 12 дона Туркистон мўйловдори, 97 дона Самарқанд храмуляси) балиқ нобуд бўлгани аниқланди.
Ушбу ҳолатга аниқлик киритиш мақсадида «Навоийазот» АЖ ва «Навоий иссиқлик электр станцияси» АЖ корхоналарининг Зарафшон дарёсига ташланадиган оқова сувларидан «Навоийазот» АЖ санитар лабораторияси ва экология бошқармасининг атроф-муҳит ифлосланишини мониторинг қилиш аналитик лабораторияси билан «Навоийазот»АЖ корхонасининг №-219 қудуқ, №-214 қудуқ, №-480 цех ва дарёга қуйиладиган №-267 қудуқларидан оқова сувлар намуналари олинди.
Балиқларнинг оммавий нобуд бўлиш сабабларини аниқлаш учун вилоят ветеринария ва озиқ-овқат маҳсулотлари ташхиси лабораторияси томонидан нобуд бўлган балиқлардан намуналар олинди. 829 дона балиқни дарёдан йиғиб олиш учун қўшимча равишда резина қайиқлар ва Экология бошқармасининг давлат инспекторлари жалб этилиб, дарёдан йиғиб олиш чоралари кўрилмоқда. Ҳозирда мазкур ҳолат юзасидан суриштирув ишлари олиб борилиб, табиатга етказилган зарар миқдори аниқланмоқда.
Изоҳ (0)