Тошкентнинг икки туманидаги айрим жойлар электрсиз қолди — ҳудудлар рўйхати

Тошкент шаҳри Яшнобод ва Миробод туманларининг айрим ҳудудларида электр таъминотида узилиш кузатилмоқда. Бу ҳақда Энергетика вазирлиги матбуот хизмати хабар берди.

Қайд этилишича, соат 21:10 да Яшнобод ва Миробод туманларининг айрим ҳудудларини электр энергияси билан таъминловчи юқори кучланишли 110 кВ тармоғида носозлик юзага келган. Бунинг оқибатида Яшнобод туманининг Авиасозлар, «Ғалабанинг 40 йиллиги» массивлари, Мухтор Ашрафий кўчалари ва Миробод туманининг Фитрат, Янги Замон, Иноқобод, Файзобод, Эски Отчопар, Оқбилол кўчаларида электр таъминотида узилиш кузатилмоқда.

Ҳозирда Энергетика вазирлиги, Тошкент шаҳри электр тармоқлари корхонаси мутахассислари томонидан носозликни бартараф этиш ишлари олиб борилмоқда. Таъмирлаш ишлари қисқа фурсатда (1,5 соатда) якунланади ва электр таъминоти қайта тикланади. Ҳолат юзасидан қўшимча маълумот берилади.

Келтирилган ноқулайликлар учун истеъмолчилардан узр сўраймиз, — дейилади хабарда.

Мавзуга доир:

• Тошкентдаги маҳалла байрам кунида бир ярим соат электрсиз қолди
• Тошкентнинг Яшнобод туманидаги подстанцияда носозлик юз берди (видео)