Тошкент халқаро аэропортида автотураргоҳларни реконструкция қилиш ва катталаштириш натижасида автомобиль турар жойларининг умумий сони икки баробар ортади, деб хабар бермоқда Uzbekistan Airports матбуот хизмати.
Қайд этилишича, бугунги кунга қадар Uzbekistan Airports балансига Тошкент аэропортининг халқаро авиақатновлар терминали атрофидаги олтита автотураргоҳ топширилган. Яқин вақт ичида ўртача 400 автомобилга мўлжалланган яна бир автотураргоҳнинг топширилиши кутилмоқда.
Айни кунларда пойтахт аэропорти яқинидаги мавжуд автотураргоҳларни реконструкция қилиш ва янгиларини қуриш бўйича ишлар олиб борилмоқда. Масалан, учиб кетиш зали олдидаги автотураргоҳда автомобиль турар жойлари сони 214 тадан 333 тага оширилади. Ҳудуд соябон ва савдо нуқталарини олиб ташлаш, шунингдек, автобус ва таксилар учун кириш йўлакларини қайта қуриш ҳисобига кенгайтирилади.
Шунингдек, учиб келиш зали олдида 175 ўринли янги автотураргоҳ яратилиб, 122 ўринли мавжуд автотураргоҳ реконструкция қилинди. Умуман олганда, аэропорт атрофидаги ҳудуднинг янги лойиҳасига асосан автомобиль турар жойлари сони 187 фоизга — 336 тадан 630 тагача кўпайтирилди.
Учиш ва келиш заллари орасидаги автотураргоҳ ҳам реконструкция қилинмоқда ва у меҳмонхонага/меҳмонхонадан ташишни амалга оширувчи туристик автобуслар ва микроавтобуслар учун мўлжалланган. Чекка ҳудуддаги иккита автотураргоҳ ҳам келгусида реконструкция қилиниши режалаштирилмоқда. Яшил ҳудуддаги катта автотураргоҳ ҳозирда Uzbekistan Airports балансига ўтказилмоқда.
«Аэропорт олди ҳудудининг янги лойиҳаси ҳудудни оптималлаштириш ҳисобига автотураргоҳлар сонини кўпайтириш, шунингдек, барча транспорт турлари — автобуслар, шахсий автомобиллар ва таксилар учун алоҳида йўлаклар қуриш имконини беради. Лойиҳага кўра, одамлар кўчада турмаслиги лозим, автотураргоҳ — фақат автомобиллар учун.
Йўловчилар кузатувчи ва кутиб олувчилар учун эса терминалнинг ўзида шароитлар яратилмоқда. Тез орада учиш залининг учинчи қаватида умумий овқатланиш ва чакана савдо шохобчалари ишга тушади. Учиб келиш зали олдида кутиб олувчилар учун қишда иссиқ, ёзда салқин бўладиган ёпиқ иншоотлар, шунингдек, ўриндиқлар ва савдо нуқталари қурилиши режалаштирилган.
Қўшимча қилиш лозимки, экологик ташаббусларни қўллаб-қувватлаш мақсадида ҳудудда юздан ортиқ дарахтлар экилади», — дейилади Uzbekistan Airports матбуот хизмати хабарида.
Аэровокзал атрофидаги ишларни жорий ҳафтада якунлаш режалаштирилмоқда.
Мавзуга доир:
Изоҳ (0)