Бухоро вилоятининг Ромитан тумани Қуйи Миришкор қишлоғидаги хонадонда газ баллони портлаб, ёнғин содир бўлди, дея хабар берди «Дарё» мухбири.
Ҳудудда яшовчи фуқаронинг билдиришича, портлаш овози жуда ваҳимали эшитилган.
«Қўрқиб уйғониб кетдик. Сергаклик билан кўчага отилдик. Қишлоқдошимизнинг хонадонида газ баллони портлаб, уйи ёниб кетаётганига гувоҳ бўлдик. Том қисми учиб кетган ва бошқа хонадонларга зиён етказмаган бўлса-да, ёнғин учқуни уларнинг ҳам ҳовлисига учиб тушаётганди. Қишлоқ одамлари челакда сув, қум ташиб, ёрдамга отилдик», — дейди шу қишлоқда яшовчи йигит.
Фуқаронинг билдиришича, ёнғин хонадонга жуда катта зарар етказган.
«Хонадон вакилларидан бири ярим тунда ошхонага кирганда, чироқни ёққан. Ва кутилмаганда фалокат юз берган. Уй-жой, мол-мулклари ёниб кетди. Аллоҳга шукур, ўзларига зиён етмабди. Жонлари соғ», — дейди суҳбатдош.
«Дарё» мухбири ҳолатга аниқлик киритиш мақсадида вилоят Фавқулодда вазиятлар бошқармаси ахборот хизмати раҳбари Миржон Файзуллаев билан телефон орқали боғланган.
«Жорий йилнинг 27 август куни соат 00:05 да Ромитан туманидаги ‘Аттарон’ МФЙ, Қўйимиришкор қишлоғида ёнғин содир бўлаётгани тўғрисида Ромитан туман ФВБга хабар келиб тушди. Хабар юзасидан фуқаронинг яшаш хонадонига 3 та ёнғин қутқарув автоэкипажи жалб этилди. Ушбу экипаж манзилга соат 00:20 да етиб борди. Бу пайтгача эса хонадоннинг 81 кв/метр майдонининг том қисми ва уй жиҳозлари ёниб кетгани аниқланди. Ёнғин 01:40 да тўлиқ бартараф этилди», — деди Миржон Файзуллаев.
Дастлабки маълумотларга кўра, фуқароларнинг куйиш ва ҳалок бўлиши ҳолатлари қайд этилмаган.
Изоҳ (0)