«Тадбиркорликни танлаб, адашмаганимга яна бир карра ишонч ҳосил қилдим» — қашқадарёлик 27 ёшли тадбиркор аёл

Кеча, 22 август куни президент Шавкат Мирзиёев тадбиркорлар билан очиқ мулоқот ўтказди. Мулоқот чоғида тадбиркорлар учун қатор ўзгаришлар бўлишини эълон қилди.

Қашқадарё вилоятининг энг чекка туманларидан бири — Деҳқонободда фаолият юритувчи тадбиркор 27 ёшли Феруза Норсафарова президентнинг тадбиркорларга яратиб бераётган имкониятларидан илҳомланиб, бу борадаги фикрларини «Дарё» билан бўлишди.

Кечаги учрашув шахсан мен учун узоқ кутилган ва орзумни амалга оширишимга имкон берувчи учрашувлардан бири бўлди. Шахсан давлат раҳбарининг ўзи биз тадбиркорлар муаммоси билан қизиқаётгани, бизга имоконият бераётгани қувонарли ҳол. Ва танлаган йўлимиздан ҳар қанча фахрланишимизга арзирлик воқеа десак, хато қилмаган бўламан.

Биласизми, дадам ҳам тадбиркор бўлгани учун ёшлигимдан тадбиркорлик нонини едим. Имкон қадар кўпроқ даромад топиб, тадбиркорлигимизни ривожлантириш йўлларини изладим. 24 ёшимдаёқ давлат раҳбарининг қўллаб-қувватлови билан дадамнинг бизнесидан алоҳида бизнесимни йўлга қўйдим. Миллиардлаб маблағим бор, қўл остимда 31 нафар ходим фаолият юритади. Кечаги учрашув ва давлат раҳбари яратиб бераётган имконият сабаб эса энди бизнесимни икки карра ривожлантираман, — дейди деҳқонободлик тадбиркор Феруза Норсафарова.

Кеча тадбиркорлик корхоналари тоифаларга ажратилиб, уларни қўллаб-қувватлаш бўйича алоҳида ёндашувлар белгиланиши эълон қилинди. 1 миллиард сўмгача бўлгани — микробизнес бўлса, 10 миллиард сўмгача бўлгани — кичик бизнес, 100 миллиард сўмгача бўлгани ўрта бизнес сифатида талқин қилиниб, тадбиркорларга енгилликлар берилмоқда. Микробизнес учун ягона солиқ ставкаси 2023 йил 1 январдан бошлаб микробизнес учун айланмадан олинадиган солиқнинг амалдаги 4 фоиздан 25 фоизгача бўлган солиқ ставкалари ўрнига, ягона 4 фоизли солиқ ставкаси жорий этилмоқда. Олис ҳудудлардаги ва алоҳида тоифадаги тадбиркорлар учун амалдаги 1 ва 2 фоизли ставкалар сақлаб қолинар экан. Олдинги тартиб бўйича, «обороти» бир йилда 100 миллион сўм бўлган тадбиркор 4 миллион сўмдан 25 миллион сўмгача солиқ тўлаган бўлса, энди эса ягона ставка — 4 миллион сўм тўлайди. Бу савдо айланмаси миқдоридан келиб чиқиб, ўзгариши мумкин. Яъни, масалан, 1 миллиард сўм айланмага эга бўлганлар 250 миллион ўрнига 40 миллион тўлайди. Хўш, бундан ортиқ бизга яна нима керак? Фақат ишлаш ва меҳнат қилиш қолди», — дейди тадбиркор.

Яна бир қувончли жиҳати, тарбиркор ўз хоҳиши билан 20-30 миллион сўм солиқ тўласа, бухгалтерия ҳисобини юритиш ва ўша ҳисоботни солиқ идораларига юбориши шарт бўлмайди. Бу орқали тадбиркор, биринчидан, 40 миллиондан камроқ солиқ тўлайди, иккинчидан қоғозбозликдан озод бўлади. Ҳозирги мавжуд солиқ солиш тартиби мантиққа зид эди. Тадбиркорларни камроқ айланма қилишга, натижада камроқ пул топишга мажбурларди. Натижада тадбиркорлар бировларнинг номига сохта юридик шахслар очиб, солиқдан чегириб қолишга уринишади, ёки норасмий ишлашга, нақд пулда олди-берди қилишга ўтиб кетишади. Янги тартиб тадбиркорлар учун хотиржам ишлашга, солиқ юкидан чўчимасликка имконият беради. Натижада эса ҳамма — ҳам бизнес, ҳам давлат ютиб чиқади. Тадбиркор ва солиқчи қалин дўст бўлади, — дейди тадбиркор аёл.

Шу юртда туғилганимдан, айнан Ўзбекистонда тадбиркорлик қилаётганимдан жудаям мамнунман. Тўғри, ким учундир бу баландпарвоз гап бўлиб туюлар, аммо ишонинг, президентимиз яратиб бераётган имконият сабаб мен ва мен каби тадбиркорлар соатига бойиб боряпмиз. Кечаги имконият эса ҳаммасидан зўри бўлди. Хуллас, бир гап билан айтганда, мен бахтлиман ва янаям бахтли бўлиш учун менда барча имкониятлар бор. Ишонтириб айтаманки, келажакда айнан президентимиздан «Ўзбекистонда хизмат кўрсатган тадбиркор» унвонини ҳам оламан, — дейди у.