«Ливерпуль» АПЛда 21 ўйин деганда илк бор мағлуб бўлди ва 10 йил аввалги антирекордни такрорлади

«Ливерпуль» Англия Премер Лигасининг 3-турида «Манчестер Юнайтед»га ютқазиб қўйди (1:2).

Бу мерсисайдликлар учун АПЛ доирасида 2021 йилнинг 28 декабридан кейинги илк мағлубият бўлди.

Ўтган мавсумда «Ливерпуль»ни мағлуб этган сўнгги жамоа «Лестер » бўлганди. Шундан кейин Юрген Клопп шогирдлари чемпионатда 16 та ғалаба ва бешта дуранг қайд этди.

«Ливерпуль» АПЛ 2022/23 йилги мавсумидаги дастлабки учта турда ғалаба қозона олмади. Бунга қадар икки турда дуранг натижалар қайд этилганди: «Фулҳэм» (2:2), «Кристал Пэлас» (1:1).

Сўнгги бор мерсисайдликлар 2012/13 йилги мавсумда дастлабки учта турда ғалаба қозона олмаганди. Ўшанда жамоа 6-турга келиб илк ғалабасини қўлга киритган ва мавсумни 7-ўринда якунлаганди.

Кейинги турда «қизиллар» 27 август куни «Борнмут»га қарши баҳс олиб боради.