Роберт Левандовски «Барселона»да Роналдо ва Салинаснинг кўрсаткичини қайд этди

Испания чемпионатининг 2-турида «Барселона» сафарда «Реал Сосьедад» устидан 4:1 ҳисобида ғалаба қозонди.

Ла Лигадаги дебют голини урган Роберт Левандовски учрашувда дублга эришди. Польшалик ҳужумчи ўз туғилган кунида дубль қайд этган «Барселона» тарихидаги учинчи футболчи, дея хабар беради MisterChip.

Сўнгги бор 1996 йил 22 сентябрь куни бразилиялик Роналдо ҳам айнан «Реал Сосьедад»га қарши ўйинда иккита гол урганди. Илк бор Хулио Салинас 1988 йил ўз туғилган кунида «Сельта» дарвозасини икки бор ишғол қилган.

Левандовски «Барселона» тарихида Андрес Иньестадан кейин (2009 йил «Рекреативо»га қарши ўйин) энг тезкор гол урган футболчига айланди. Шунингдек, Роберт каталонияликлар тарихида Хавьер Савиоладан сўнг (2004 йил «Вальядолид»га қарши ўйин) меҳмондаги энг тезкор гол муаллифи бўлди.

Эслатиб ўтамиз, Левандовски ёзда 45 миллион евро эвазига «Бавария» сафидан «Барселона»га ўтган эди. Ҳужумчи каталонияликлар билан 2026 йил 30 июнга қадар мўлжалланган шартномага имзо чеккан.