Ispaniya chempionatining 2-turida “Barselona” safarda “Real Sosyedad” ustidan 4:1 hisobida g‘alaba qozondi.
La Ligadagi debyut golini urgan Robert Levandovski uchrashuvda dublga erishdi. Polshalik hujumchi o‘z tug‘ilgan kunida dubl qayd etgan “Barselona” tarixidagi uchinchi futbolchi, deya xabar beradi MisterChip.
So‘nggi bor 1996-yil 22-sentabr kuni braziliyalik Ronaldo ham aynan “Real Sosyedad”ga qarshi o‘yinda ikkita gol urgandi. Ilk bor Xulio Salinas 1988-yil o‘z tug‘ilgan kunida “Selta” darvozasini ikki bor ishg‘ol qilgan.
Levandovski “Barselona” tarixida Andres Inyestadan keyin (2009-yil “Rekreativo”ga qarshi o‘yin) eng tezkor gol urgan futbolchiga aylandi. Shuningdek, Robert kataloniyaliklar tarixida Xavyer Savioladan so‘ng (2004-yil “Valyadolid”ga qarshi o‘yin) mehmondagi eng tezkor gol muallifi bo‘ldi.
Eslatib o‘tamiz, Levandovski yozda 45 million yevro evaziga “Bavariya” safidan “Barselona”ga o‘tgan edi. Hujumchi kataloniyaliklar bilan 2026-yil 30-iyunga qadar mo‘ljallangan shartnomaga imzo chekkan.
Izoh (0)