Бухоро вилоятининг Қоровулбозор туманида замонавий нефтни қайта ишлаш заводини барпо этилиши республикамизда тарихий воқеа бўлди.
Ҳукуматнинг 1993 йил 3 августдаги 389-сонли қарори билан заводни қуриш ишлари бошланди ва қисқа муддатда 1997 йил 22 августида ишга туширишга муваффақ бўлинди. Қурилишни лойиҳалаштириш ва технологик жараёнларни танлашда жаҳоннинг етакчи нефть ва газ компаниялари билан ҳамкорликда ўша даврнинг илғор ечимларидан фойдаланилди.
Ўтган 25 йил ичида завод истеъмолчиларни республика иқтисодиёти тармоқлари ва аҳолиси учун зарур бўлган нефть маҳсулотлари билан узлуксиз таъминлаб келмоқда.
Бухоро нефтни қайта ишлаш заводининг 25 йиллиги муносабати билан Бухоро шаҳридаги Ёшлар маркази биносида тантанали тадбир ташкил этилди. Тадбир «Ўзбекнефтгаз» АЖ бошқаруви раиси Меҳриддин Абдуллаевнинг байрам табриги билан очиб берилди.
Тантанали тадбирга ташриф буюрган Бухоро вилояти ҳокими Ботир Зарипов ўтган давр ичида завод республика иқтисодиёти тармоқлари ва аҳолиси учун ўта зарур бўлган нефть маҳсулотлари билан узлуксиз таъминлаш устида тинимсиз ишлар олиб бораётган «Ўзбекнефтгаз» АЖ ва завод раҳбарияти, ишчи-ходимларига ўз миннатдорчилигини билдириб, самимий тилакларини изҳор этди.
Заводнинг сўнгги 5 йиллик фаолиятини таҳлил этадиган бўлсак, дастлаб, юқори октанли АИ-91, 92, 93, 95 русумли бензинлар, сўнгра экологик тоза ЭКО русумли дизель ёнилғиси ва ҳаво лайнерлари учун замонавий Жет А-1 русумли авиация ёнилғиси ишлаб чиқаришни йўлга қўйишга эришилганлигини кўриш мумкин. Жорий йил бошида Евро-4, 5 экологик тоифадаги дизель ёнилғиси ишлаб чиқаришнинг йўлга қўйилганлиги ҳам катта ютуқлардан биридир.
Йилига 2 миллион тоннага яқин, жумладан, 25 йилда қарийб салкам 50 миллион тонна хом ашё қайта ишланган. Заводнинг қайта ишлаш қувватларидан йилдан йилга кўпроқ фойдаланилиши, маҳаллий ва республика бюджетига қарийб 5 триллион сўмга яқин солиқлар тўлангани ва бир қатор ижтимоий вазифаларнинг бажарилгани олиб борилаётган ислоҳотларнинг натижасидир.
Шуни алоҳида таъкидлаш жоизки, корхонанинг барқарор ишлаши ва ривожланиши кўп жиҳатдан ходимларнинг профессионаллигига боғлиқ. Шу сабаб ходимлар малакасини ошириш учун доимий курслар ташкил этилиб, тажриба алмашиш учун йирик халқаро компанияларда юбориш йўлга қўйилган. Бу эса ўз самарасини заводнинг бугунги ютуқларида қўрсатмоқда. Завод тараққиётига ўз ҳиссаларини қўшган 90 нафар ишчи-ходим Бухоро нефтни қайта ишлаш заводи ташкил топганининг 25 йиллик санаси муносабати билан тақдирланди.
Улар Энергетика вазирлиги, «Ўзбекнефтгаз» АЖ, Касаба уюшмалари федерацияси ҳамда Бухоро вилояти ҳокимлиги томонидан медаллар ва эсдалик совғалари билан тақдирланди.
Сўнгги йилларда заводда тармоқлараро кооперация алоқаларини кенгайтириш бўйича эришилган муваффақиятларни ҳам қайд этмасликнинг иложи йўқ. Хусусан, «Квалитет Восток Group» МЧЖ билан ҳамкорликда ЕВРО-4,5 дизель ёқилгиси учун мойловчи қўндирма, «Фарғонаазот» АЖ билан ҳамкорликда тринатрий фосфатнинг кимёвий реагент, «Штурвал» МЧЖ билан ҳамкорликда аминли тозалаш қурилмаси фаоллаштирилган кўмири ҳамда ЎНА ва А воситаларининг ҳавосини қуритиш қурилмасида фойдаланиладиган силикагел импорт ўрни босилди.
2020-2021 йилларда «Янги маҳсулотлар» ишлаб чиқариш дастури доирасида ултра паст даражада олтингугурт сақлаган Евро-4,5 тоифасидаги дизель ёқилғиси, эксплуатацион хоссалари яхшиланган Аи-95 «QuWatt» маркасидаги янги автомобиль бензини, техник суюқ кислород ва Ўзбекистон ва Бухоро НҚИЗ тарихида илк маротаба АИ-98 русумли юқори октанли автомобиль бензин ишлаб чиқариш йўлга қўйилди. 2022 йилда Евро-6 синфидаги дизель ёқилғисини ишлаб чиқариш ўзлаштирилди.
Бугунги кунда заводда модернизация ва реконструкция қилиш лойиҳаси доирасида мавжуд қувватларни қайта ишлаш чуқурлигини 79 фоиздан 95 фоизгача, оч тусли нефть маҳсулотларининг рентабеллигини 77 фоиздан 91 фоизгача ошириш ишлари жадал суръатларда бажарилмоқда.
Шундай улкан мақсадлар йўлида фидокорона хизмат кўрсатаётган ишчи-ходимлар учун ташкил этилган тадбирда эл ардоғидаги санъаткорлар томонидан гўзал қўшиқ ва рақслар ижро этилди.
«Ўзбекнефтгаз» АЖ матбуот хизмати
Изоҳ (0)