Савдо-саноат палатаси Ҳукумат бўйсунувидан тўлиқ чиқарилади

Шавкат Мирзиёев тадбиркорлар билан очиқ мулоқотда нутқ сўзламоқда, деб хабар берди «Дарё» мухбири.

Президент Савдо-саноат палатаси ва унинг худудий бўлинмаларининг фаолияти ҳам тубдан ўзгаришини айтди.

Бундан буён, улар:

• туман, шаҳар тадбиркорларини бирлаштириб, уларни қийнаётган муаммо ва масалаларни аниқлаш билан амалда шуғулланади;
• ҳар бир туман ва шаҳарда илғор методикалар асосида бизнесга ўқитиш мактабларини ташкил қилади;
• ҳоким ва бошқа ҳудудий раҳбарларга кўриб чиқиши мажбурий бўлган тақдимномалар киритиш ваколатига эга бўлади;
• маҳаллий Кенгаш ва ҳокимлар билан ҳар ой камида икки марта танқидий муҳокамаларни ўтказади.

• Ҳукуматга кўриб чиқиши мажбурий бўлган масала киритиш;
• тадбиркор манфаатини кўзлаб Олий судга ариза бериш ҳамда иқтисодий, маъмурий ва жиноят ишлари бўйича суд қарорларини қайта кўриб чиқиш юзасидан шикоят киритиш ваколатлари берилади.

Шунингдек, мазкур мулоқотда айтилган барча таклифларни амалга ошириш учун Президент ҳузурида Тадбиркорликни қўллаб-қувватлаш бўйича Жамоатчилик кенгаши тузилади.

Президент Администрацияси раҳбарига икки ҳафта муддатда  ушбу кенгаш ишини ташкил қилиш топширилди.