2022 йил 19 август куни Ўзбекистон ташқи ишлар вазири в.б. Владимир Норов Шанхай Ҳамкорлик Ташкилотига аъзо давлатлар Хавфсизлик кенгашлари котибларининг навбатдаги йиғилишида иштирок этиш учун Ўзбекистонга ташриф буюрган Ҳиндистон бош вазирининг миллий хавфсизлик бўйича маслаҳатчиси ўринбосари Викрам Мисри билан музокаралар ўтказди.
Томонлар икки давлат раҳбарларининг ўзаро ишончли мулоқоти ва амалий саъй-ҳаракатлари туфайли эришилган Ўзбекистон–Ҳиндистон стратегик шериклик ҳамда кўп қиррали ҳамкорлик муносабатларини ривожлантиришдаги жадал ўсишни мамнуният билан қайд этдилар.
Викрам Мисри Ҳиндистон ҳукумати мамлакатда амалга оширилаётган кенг кўламли ислоҳотлар йўналишини ҳар томонлама қўллаб-қувватлашини билдириб, Нью-Деҳли Ўзбекистон билан барча икки томонлама йўналишларда ҳамда «Ҳиндистон+Марказий Осиё» формати шакли доирасида ҳамкорликни фаоллаштиришга тайёрлигини таъкидлади.
Ўзбекистон томонининг Марказий ва Жанубий Осиё ўртасидаги ўзаро боғлиқликни ривожлантиришга қаратилган саъй-ҳаракатлари юқори баҳоланди. Бу ташаббус тарихан яқин бўлган икки минтақанинг улкан савдо-иқтисодий, инвестициявий, транспорт ва транзит салоҳиятини рўёбга чиқариш учун янги имкониятлар очади.
Дунё ва минтақадаги бугунги вазият юзасидан фикр алмашилди. Викрам Мисри Ўзбекистоннинг Афғонистонга гуманитар ёрдам кўрсатиш, мазкур мамлакат иқтисодиётини тиклашга қаратилган инфратузилма, транспорт ва энергетика лойиҳаларини амалга ошириш бўйича фаол қадамларини олқишлади.
Халқаро институтлар орқали ҳамкорликни йўлга қўйиш бўйича келишувга эришилди. Шанхай ҳамкорлик ташкилоти доирасида бўлиб ўтадиган тадбирларнинг ташкилий жиҳатларига алоҳида эътибор қаратилди. Ҳиндистон делегацияси Ўзбекистоннинг ШҲТга раислигининг устувор йўналишларини амалга оширишда ҳар томонлама кўмак кўрсатишга тайёрлигини маълум қилди.
Изоҳ (0)