2022-yil 19-avgust kuni O‘zbekiston tashqi ishlar vaziri v.b. Vladimir Norov Shanxay Hamkorlik Tashkilotiga a’zo davlatlar Xavfsizlik kengashlari kotiblarining navbatdagi yig‘ilishida ishtirok etish uchun O‘zbekistonga tashrif buyurgan Hindiston bosh vazirining milliy xavfsizlik bo‘yicha maslahatchisi o‘rinbosari Vikram Misri bilan muzokaralar o‘tkazdi.
Tomonlar ikki davlat rahbarlarining o‘zaro ishonchli muloqoti va amaliy sa’y-harakatlari tufayli erishilgan O‘zbekiston–Hindiston strategik sheriklik hamda ko‘p qirrali hamkorlik munosabatlarini rivojlantirishdagi jadal o‘sishni mamnuniyat bilan qayd etdilar.
Vikram Misri Hindiston hukumati mamlakatda amalga oshirilayotgan keng ko‘lamli islohotlar yo‘nalishini har tomonlama qo‘llab-quvvatlashini bildirib, Nyu-Dehli O‘zbekiston bilan barcha ikki tomonlama yo‘nalishlarda hamda “Hindiston+Markaziy Osiyo” formati shakli doirasida hamkorlikni faollashtirishga tayyorligini ta’kidladi.
O‘zbekiston tomonining Markaziy va Janubiy Osiyo o‘rtasidagi o‘zaro bog‘liqlikni rivojlantirishga qaratilgan sa’y-harakatlari yuqori baholandi. Bu tashabbus tarixan yaqin bo‘lgan ikki mintaqaning ulkan savdo-iqtisodiy, investitsiyaviy, transport va tranzit salohiyatini ro‘yobga chiqarish uchun yangi imkoniyatlar ochadi.
Dunyo va mintaqadagi bugungi vaziyat yuzasidan fikr almashildi. Vikram Misri O‘zbekistonning Afg‘onistonga gumanitar yordam ko‘rsatish, mazkur mamlakat iqtisodiyotini tiklashga qaratilgan infratuzilma, transport va energetika loyihalarini amalga oshirish bo‘yicha faol qadamlarini olqishladi.
Xalqaro institutlar orqali hamkorlikni yo‘lga qo‘yish bo‘yicha kelishuvga erishildi. Shanxay hamkorlik tashkiloti doirasida bo‘lib o‘tadigan tadbirlarning tashkiliy jihatlariga alohida e’tibor qaratildi. Hindiston delegatsiyasi O‘zbekistonning SHHTga raisligining ustuvor yo‘nalishlarini amalga oshirishda har tomonlama ko‘mak ko‘rsatishga tayyorligini ma’lum qildi.
Izoh (0)