Давлат солиқ қўмитаси солиқ тўловчининг ҳисоботида хато ва тўлиқ бўлмаган маълумотлар аниқланганда қандай йўл тутилиши ҳақида маълумот берди.
Қайд этилишича, солиқ тўловчи ёки солиқ органи томонидан илгари тақдим этилган солиқ ҳисоботида солиқнинг ҳисобланган суммасини камайтириб кўрсатишга (ўзгартиришга) олиб келган нотўғри ёки тўлиқ бўлмаган маълумотлар, хатолар аниқланган бўлса, солиқ тўловчи аниқлаштирилган солиқ ҳисоботини тақдим этади. Солиқ органи томонидан солиқ ҳисоботини тақдим этишдаги номувофиқлик, хатолар текширувдан олдинги таҳлил натижасида ҳам, камерал солиқ текшируви натижасида ҳам аниқланиши мумкин.
Текширувдан олдинги таҳлил давомида номувофиқликлар аниқланса, солиқ тўловчига шахсий кабинет орқали хабарнома ва камерал солиқ текшируви натижалари бўйича эса солиқ ҳисоботига тегишли тузатишлар киритиш тўғрисида сўровнома юборилади.
Солиқ тўловчи биринчи ҳолатда, 10 кунлик муддатда, иккинчи ҳолатда эса 5 кун ичида аниқлаштирилган солиқ ҳисоботини ёки аниқланган тафовутларнинг асосномасини тақдим этиши лозим.
Президент фармонига мувофиқ, 2022 йил 1 январдан камерал солиқ текшируви натижалари бўйича аниқланган ҳуқуқбузарликлар учун молиявий санкциялар қўлланилмайди.
2022 йил 1 август ҳолатига кўрилган назорат тадбирлари натижаларига кўра, 38,2 минг солиқ тўловчи томонидан тақдим этилган солиқ ҳисоботларида 3 триллион сўмлик тафовутлар аниқланган. Солиқ тўловчиларга йўл қўйилган хато ва номувофиқликларни ихтиёрий равишда тузатиш имконияти берилиши натижасида уларга 609 миллиард сўмлик молиявий жарималар қўлланилмаган.
Мавзуга доир:
Изоҳ (0)