Расман: «Манчестер Юнайтед» Каземиро трансферини эълон қилди

«Реал» ярим ҳимоячиси Каземиро «Манчестер Юнайтед»га ўтди.

Манкунианликлар 30 ёшли футболчи трансфери борасида келишувга эришганини маълум қилди.

Ушбу трансфер бразилиялик тиббий кўрикдан ўтгач ва Буюк Британия визасини олиш талаблари бажарилгач, футболчи ва «Манчестер Юнайтед» ўртасидаги келишув орқали якунланади.

Каземиро инглиз клуби сафида ҳафтасига 350 минг фунт маош олади.

Аввалроқ «қизил иблислар» ярим ҳимоячи учун 60 миллион евро ва қўшимча 10 миллион евро бонус сифатида тўлаб бериши хабар қилинганди.

Каземиро 2013 йилда «Реал» академиясига қабул қилинганди. 2014/15 йилги мавсумни «Порту»да ижарада ўтказган футболчи 2015 йилдан «Мадрид»нинг асосий таркибидан мустаҳкам ўрин олган.

Бразилиялик ярим ҳимоячи «қаймоқранглилар» билан 3 мартадан Испания чемпионати ва мамлакат Суперкубогини, бир марта Испания Кубогини, 5 марта Чемпионлар Лигасини, 3 марта клублар ўртасидаги жаҳон чемпионлигини қўлга киритган.