“Real” yarim himoyachisi Kazemiro “Manchester Yunayted”ga o‘tdi.
Mankunianliklar 30 yoshli futbolchi transferi borasida kelishuvga erishganini ma’lum qildi.
Ushbu transfer braziliyalik tibbiy ko‘rikdan o‘tgach va Buyuk Britaniya vizasini olish talablari bajarilgach, futbolchi va “Manchester Yunayted” o‘rtasidagi kelishuv orqali yakunlanadi.
Kazemiro ingliz klubi safida haftasiga 350 ming funt maosh oladi.
Avvalroq “qizil iblislar” yarim himoyachi uchun 60 million yevro va qo‘shimcha 10 million yevro bonus sifatida to‘lab berishi xabar qilingandi.
Kazemiro 2013-yilda “Real” akademiyasiga qabul qilingandi. 2014/15-yilgi mavsumni “Portu”da ijarada o‘tkazgan futbolchi 2015-yildan “Madrid”ning asosiy tarkibidan mustahkam o‘rin olgan.
Braziliyalik yarim himoyachi “qaymoqranglilar” bilan 3 martadan Ispaniya chempionati va mamlakat Superkubogini, bir marta Ispaniya Kubogini, 5 marta Chempionlar Ligasini, 3 marta klublar o‘rtasidagi jahon chempionligini qo‘lga kiritgan.
Izoh (0)